听到天气预报讲，搿天气温会有36、37摄氏度。天气忒热，勿想做啥事体。不过，饭总归要吃个呀。还算好，从屋里走出去也就是三五分钟路程里就有小超市，小菜、冷饮侪有得卖，趁早浪太阳还勿大结棍，就去跑一埭。

　　前两天电脑坏脱了，重新买了笔记本、存储卡咾啥；又一时头馋痨，买了小核桃肉，想想可能会有快递要来，就想去买一眼冷饮备辣海。结果，从小吃惯个光明牌盐水棒冰、赤豆棒冰、绿豆棒冰咾啥侪呒没，只好买了点东北大板。以前尝过，口感跟光明牌奶油雪糕差勿多。4块半一根，辣辣搿歇辰光，算得上是价廉物美了。

　　早饭吃好呒没多少辰光，快递就开始来了。

　　先是送电脑。开门一看，眼睛一亮，伊阿会上门前稍许捺自家弄清爽了？绿颜色翻领T恤，黑颜色长裤，看上去端端正正一丝不苟。叫伊等一歇歇，伊呒啥表情，手背辣后头，静静交。东北大板交到伊手里辰光，伊人呆了一呆，表情软了一软，接过，讲一声谢谢，就下楼去了。

　　再等一歇是送小核桃个。哦哟，一件灰驳落拓个白衬衫贴了身浪向，人好像是从水里撩出来一样。叫伊等一歇歇，伊还有点叽里咕噜。所以，伊接过东北大板个辰光，一边穷谢，一边有眼勿好意思：刚刚是生怕下面东西畀人家捺走……

　　顶好白相是请来安装电脑个小弟。小弟已经蛮熟了，屋里电脑出问题侪是伊来解决。伊一边做生活，一边吃一杯阿拉自制冰镇饮料。“嗯，味道蛮好，蓝莓汁？”“桑葚汁，自家泡个，稍许放点蜂蜜。侬回去也可以做一眼。”“算了，阿拉过日脚老简单了，平时也就矿泉水，不过，搿倒是比矿泉水好吃交关……”“葛末，再吃一杯？”小弟整理包包刚要走，又坐下：“要末，吃一杯再走？”

　　哈哈，清凉得一天世界。