出于对现在上海小囡多数勿会讲上海闲话个忧虑，有教授编写了小学沪语教材，供上海小囡学讲上海闲话派用场。专家个一片苦心搭辛勤劳动，值得大家敬佩。 

　　小囡学讲闲话应该是垃拉日常世久当中由大人口口相传学会个，垃拉课堂浪向学真叫呒没办法个办法。现在上海个小囡勿会讲上海闲话，是长期缺少沪语语境个结果。伊拉3周岁进幼儿园，6周岁进小学，辣伊拉学习语言最好个辰光，老师们讲个侪是普通话，小朋友们自然也只讲普通话。伊拉夜里向回到屋里，本来讲上海闲话（或其他方言）个家长往往也被伊拉“俘虏”过去，也搭小囡讲起普通话来。对于推广普通话来讲，迭个当然可说是卓有成效。但是，推广普通话勿是封杀方言，而垃拉我伲一家学堂里实行个就是封杀个政策。伊拉规定老师学生垃拉下课辰光也要讲普通话，违者就要受到批评，甚至影响评先进评三好咾啥。搿就过分了，走入误区了。其实，现在小囡个个会白相电脑，个个会输入汉字，普通话勿可能勿灵光。当务之急倒是要造就沪语个语境，垃拉“非正式”场合，垃拉提倡说普通话个同时，也允许讲上海闲话或其他方言，勿要拿讲方言看作是对推广普通话个抵制。如果有一天，勿管新上海人还是老上海人，个个讲起普通话来字正腔圆，讲起上海话则是软糯流利，搿种普通话搭仔方言和谐共处个局面该是多少好啊！