小辰光读书晓得上海个天气是四季分明，春夏秋冬个长短推扳勿多。现在有变化了，春、秋缩水，热天、冷天涨长了。勿仅如此，如今个热天还特别热，热煞人；冷天还特别冷，冻煞人。今年热天上海是被关进了桑拿浴室，老老小小侪热得吃勿消了。 

　　阿拉搿眼年过半百个上海人从小是靠一把蒲扇来熬过大热天个。呒没空调、冰箱、呒没电风扇。屋里向能摆出一台摇头电风扇个肯定是有点立升个大人家。由此一到热天，弄堂里个小囡勿是身上生出痱子个，就是头浪生出热疖头个。 

　　我到现在还弄勿清爽为啥会突然间弄出一身痱子。大人讲热得出汗个辰光勿能够去冲冷水。还讲衣裳要穿得薄点透气点，勿然就会捂出痱子。反正一到大热天，痱子、大头疖子是小朋友们大家个消费品。下半天、夜快头大家汏好浴后，头、头颈、身浪都会拍了一层雪雪白个痱子粉，拍得太多个小鬼就好比一只只白糖梅子，引人发笑。 

　　热疖头要比生痱子个情节严重得多。生出一只甚至几只热疖头是触霉头个事体。我到现在一样弄勿清爽为啥会生热疖头。开始是头顶心或者额骨头浪会有点痒，后来会有点痛，再后来就慢慢鼓出一个肿块来。小个像赤豆大小，大个有桂圆大小。热疖头就迭能样阴险个生出来了。大人马上到中药店去配点黑药膏来，涂辣方寸大小个黄表纸浪，然后敷了疖子浪。要换几次药膏，疖子才渐渐瘪下去。热疖头叫人痛得勿得了，一碰都碰勿得。生好了热疖头个只好退出小囡们白相个大小游戏。否则一不小心碰到，痛者难免要大呼小叫。热疖头滚脓个辰光还要去看医生。医生会在疖子上划出一个小口子来引出脓水。手脚辣手一点个爷娘会自家动手去挤破脓头。弄堂里有杀猪般嚎叫个小囡多半是伊拉阿爸老娘动家庭手术个受害者。 

　　我还有一个弄勿清爽个事体是，为啥现在介热个天气里出痱子个人少见了，痱子粉勿见了，而可恶个热疖头基本浪也勿见形踪了，所以辣大热天里再也难以碰到头上贴了一块狗皮膏药个大小朋友了。为啥？大家讨论吧。