上世纪八九十年代，英格兰斯诺克皇帝史蒂夫·戴维斯带领一帮斯诺克高手到上海黄浦区体育馆献艺，勒辣上海掀起了打斯诺克个热潮，我也去看了，真是盛况空前。之后，打斯诺克或者讲打桌球逐渐成了中青年个热门娱乐活动。其实，勒辣上世纪五六十年代打斯诺克就非常风行（讲早一点，解放前就流行了）。不过迭个辰光统称叫打弹子，又叫打落袋，打弹子个场所也叫弹子厅、落袋房。斯诺克是其中个一种玩法，多数是打扑脱、奥夫告开轮：台面上两颗白弹、一颗红弹，白弹是主打弹，白弹打进红弹叫扑脱，赢3分；白弹先碰红弹，自家进袋叫红弹奥夫，也赢3分；白弹碰白弹自家进袋，叫白袋奥夫，赢2分；白弹碰红弹又碰白弹，叫开轮，得2分，反之也一样。还有一种台面浪四颗弹子，专门打开轮个，迭种玩法交关少，勿大普及。讲到打斯诺克，是技巧智力要求高、邪气难个一种玩法，一般人勿大白相。

　　埃个辰光落袋房蛮多，大大小小，遍布大街小巷。比较有名气个是大光明电影院后面个大光明弹子厅；淮海路浪乐安坊有一家恰尔斯落袋房；瑞金路淮海路有一爿叫卡夫卡斯弹子房；现在个国泰电影院，从前叫国泰大戏院楼浪开有一家国泰弹子厅，还有南京路浪个新世界弹子厅。埃个辰光白相打落袋算是高档娱乐，有个旁边还开了西餐社，侪是一眼小开搭仔写字间小职员（现在叫白领），至少袋袋里有点铜钿个人消遣个场所，因为打弹子盘钿蛮高个。有眼人白相勿起，只好打打康乐球。康乐球呢，迭个是落袋个简易化、平民化，平头百姓学生子白相相，勒辣当年打一盘康乐球两分洋钿，而打一盘弹子要几角洋钿。

　　当年做学生个辰光我也去看过，学过，白相过落袋房，告咾现在电视里播放啥个国际斯诺克大赛总是看得津津有味，因为懂个关系，晓得里向个窍嵌搭仔技术，啥个摆“沙挨（side）”、做“斯诺克”（实际浪斯诺克就是障碍个意思），也叫得出国际浪斯诺克高手，像奥沙利文、希金斯、威廉姆斯，搭仔阿拉中国个丁俊晖咾啥。

　　侬还覅讲，老早打落袋个人，几乎侪规规矩矩个，穿得山青水绿，讲起闲话来文绉绉，极少出口成“脏”，有点绅士腔调，勿像打康乐球个人，比较粗气，热天价赤膊拖鞋照打勿误。当然咾，我呒没一眼贬低打康乐球个意思。