2016年开年天老爷就勿是老帮忙，强冷空气要从西伯利亚过来，像煞是三十年来顶强个“寒潮”，最低温要到零下10度！真是吓煞囡囡了。

　　不过呢，老里八早，上海更加冷个辰光也是有个，搿个再是真正吓人唻。垃明朝辰光，史书上第一趟出现了上海地区严寒个记载。1445年1月（阴历十二月），上海地方落雪，穷落八落，落了七天七夜，老百姓屋里向个门也推勿开了，为啥呢？地浪向积雪一丈二尺（大概4米），要比房顶还要高了！朝外看去叫是“一望皆白”，勿像江南水乡，却似塞北风光了，堆堆雪人打打雪仗倒是绰绰有余了。

　　更加结棍个还垃后头。1575年，天老爷又发脾气了。搿年热天介倒是邪气热，结果金山县个农夫、耕牛交关侪中暑死脱。啥人晓得到了冷天，冷是冷得来，连得淀山湖也结冰了！勿光是结冰，还出现了“高数丈，长二里许”个冰山，过了一个多号头再烊脱。搿简直是《泰坦尼克号》里向个镜头。天文学家讲十七世纪是“小冰期”，上海更加冷了。1636年、1654年、1655年、1683年、1691年、1693年，统统冷得来连得黄浦江也结冰好走人了！

　　黄浦江末脚两趟结冰是1862年跟1893年辰光。1862年1月25号开始，大雪连落三天。好点个奉贤，积雪三尺，推扳眼个宝山，雪积了有五、六尺。黄浦江也结冰了，过脱廿天再算烊脱。偏偏搿辰光是太平天国攻打上海，太平军搭仔清兵垃冰天雪地里开战。老百姓又是受寒灾又是碰到兵灾，真叫是祸不单行，日脚难过，“冻饿死者无算”。1893年1月份也是冷了勿得了，黄浦江跟淀山湖统统结冰，十几天呒没烊脱。积雪积三尺，人从冰上走。搿年已经有了近代化个温度测量方法，根据记载，1月19号搿天，上海最低温度是零下12.1摄氏度。

　　虽然后来再也呒没冷到搿地步，但场面仍旧是触目惊心个。上海解放前一年，1948年1月25号，又是大冷天，最低温度零下8.3摄氏度。当时个《申报》报道，“露宿灾黎，冻死累累，今晨一日内收敛之路尸已愈百具以上，孩尸占70%”，真是罪过！告咾闲话又讲转来了，现在又有空调又有取暖器，再冷个天，老老实实蹲了屋里终归捱得过去。勿像老底仔，啥物事侪呒没，只好硬撑，搿再叫冷了勿牢唻。