邻居宋新根今年八十岁了，看上去只有六十几岁，伊年轻个辰光是上海脚踏车队队员，运动健将。

　　有一趟伊搭我吹牛山讲，伊告张燮林打过一场球呢！我问伊，哪能打法？伊讲，张燮林让阿拉十八只球！我又问，侬阿赢到一只？伊讲，一只阿赢勿到，张燮林削过来个球，往阿里搭转也勿晓得，一碰就飞脱，一歇歇功夫，廿一只球侪输光了！我讲，怪勿得当年27届世锦赛决赛日本队个三木输拨张燮林9:21、8:21，木村5:21、11:21输脱，侪勿会打球了，打得人家屋里也寻勿到了！伊届决赛上个第一局木村还赢了庄则栋唻，随后木村又大比分输拨张燮林！我就私下想，葛末庄则栋阿打得过张燮林呢？

　　我问宋新根，张燮林哪能会告侬打球呢?宋新根讲：张燮林想白相伊个脚踏车，伊有三部车，迭个辰光，有脚踏车人家勿多，更覅讲赛车了。球输脱了，呒啥闲话好讲,脚踏车只好挺拨张燮林白相了。