柳家姆妈急煞煞等了车站浪。

　　囡儿小轶32了，从伊28岁起，柳家姆妈就到处托人，跑遍了婚介所，捧回来资料，小轶看也勿看，还讲：“侬是要拿我卖脱呀？寻对象要靠缘分，要对得上眼。”每趟侪是一顿抢白。迭趟总算答应跟伊跑一趟。原因是柳家姆妈辣拉人民公园“相亲角”寻到一个相当称心个：英国伯明翰硕士，辣一家金融机构上班，照片看一表人才，就是岁数大了点。人家娘讲，身边女小人材料一大堆。是看到柳妈长相、气质勿错，估计囡儿勿会推扳，才答应。柳妈勿得勿死磨硬泡。小轶讲：“高富帅呀，哪能会呒没女朋友？卖相好，是克鲁尼、还是金城武？”不过为了安慰一下可怜个老妈，小轶还是答应了。

　　小轶来了。短发，一件灰色夹克，里衬小方领白衬衫，一条牛仔裤，一双白球鞋。柳妈大惊，“哪能穿成迭能介！我勿是拿衣裳侪帮侬放了沙发浪了？还穿球鞋！”

　　进到近“相亲角”时，人越来越多，大多是老头、老太，手里捧仔、拎仔、举仔各样牌子，有简简单单，有密密麻麻，还有勿少打着伞，伞浪挂满了纸条，流动相亲。“相亲角”伊面个冬青树已成了小字报墙，花花绿绿、杂乱无章。勿是人与人相亲，而是牌与牌配对。目标是“相亲”但寻勿着半点爱个痕迹。

　　柳妈妈拉仔小轶快步朝约定个地方走，越是靠近小轶就越是懊悔。迭个辰光突然看见一个年轻人坐辣矮凳浪，前面放了把黑洋伞，小轶挣脱姆妈，停了下来，伞上一段白色楷书：“本人，无房无车，年龄不小；工科学士，工资有限；上有老母，诚觅贤妻；不谋富贵，只求知己”。看得小轶顿时有种异样个感觉，便蹲下身，只见伞下有两本小册子，拿起一本，是手写个诗集，有现代诗、有格律诗，字里行间蛮有哲理；又捡起另一本，是速写，画里侪是相亲角个人物，惟妙惟肖。小伙正看书，听见笑声，微微抬头，见是个漂亮姑娘，像是啥也呒没看见，继续看书。伊每周来一趟，见得多了。小轶却呒没放过伊，“喂！看啥书？”小伙子还勿抬头，顺口读了句“在伦佛街拐弯的地方，弗雷德利克租了一所小公寓……”“弗雷德利克，福楼拜的《情感教育》！”迭记小伙子惊讶得抬起头，就辣拉四目相对一刹那，有种讲勿清爽个感觉直插心头。

　　小伙子摸了摸心口，静了静，“侬看过我广告了？”“嗯，要我再读一遍？”“葛倒勿必，我是认真个，交关老人侪嘲笑我，我勿在乎，侬迭能介漂亮个小姐来白相我，就勿好了。”“我漂亮？”小轶也已打量过伊，一件棕色灯芯绒敞开着，格子衬衫已经汏得老旧了，一条米色卡其裤，翻毛皮鞋。头发有点乱，微黑个皮肤显得蛮健康，“其实我老内向，有趟路过迭搭，我理解迭些父母个心情，但反对伊拉选对象个做法，特意来充当一种另类。”小伙子讲讲笑了起来，“一周来半日，看看书，再说我也确实呒没朋友。”“谈过？”“谈过，到后来侪拨对方爷娘撬了。”“为啥？”“还为啥，我从小呒没爷，以后是一定要跟姆妈一道过个。”是个孝子，小轶心里一阵难以抑制个热流涌动，一个工科生，能写会画，还懂得爱妈妈……

　　柳妈站辣勿远，急得直跺脚。搿个小伙伊以前见过，人勿错，可呒没钞票、呒没房。小轶哪能跟伊聊个呒没停？赶紧过来，拉起小轶，“快走吧！”“勿去了！”“覅闹了，小祖宗！”迭趟小轶严肃起来，“姆妈，是我相亲，还是侬相亲？”小伙一旁觉得勿好意思，站了起来，“勿好迭能对侬姆妈，去看看吧。”呒没想到小轶对柳妈说：“姆妈，侬覅生气，我得感谢侬，今朝，我相亲任务完成了。”一边朝着小伙问：“哎！侬讲呢？”小伙呒没搭理，却麻利地收起伞，折迭起小凳，一股脑塞进了包里，抬头对柳妈讲：“阿姨，我跟侬女儿寻个地方聊一歇可以？”柳妈妈呆住了。“姆妈，侬就先回去好了。”小轶抱过妈，亲了一下。

　　柳妈妈看着两个年轻人走远，哭了，迭个根本勿是伊想像中个，但也是伊多少年来个企盼呀。