凡是讲到老底仔个人力车，好像总归是只对黄包车情有独钟，交关影视作品里，甚至一些演示老上海个展厅里侪只有黄包车。弄得现在个小青年只晓得黄包车，其实辣拉解放前后个廿年里，三轮车曾经是上海搿座城市个一道风景，老百姓离勿开，就像现在个出租车。有资料讲上世纪五六十年代，上海个三轮车至少有五千辆。

　　三轮车其实是“舶来品”，邪气精致，主体是洋人马车个腔调，从侧面看，座椅后部是圆弧状个，座椅下头装有弹簧。从后方看，座椅两侧也朝里包拢，相当漂亮。上海三轮车还有个特点是踏脚低，方便穿旗袍个女士上下，整块踏脚靠外两侧低，中间凸起，车架就从下头穿过。车子宽，三口之家出行乘坐叫关惬意。座椅、靠背侪是软垫。坐垫可以翻起来，里相一条毛毯，解放前大多是军绿色个美军遗物，冷天辰光乘客用来盖辣身浪向。另外是一大块涂过桐油个帆布，落雨了，除了支起车篷，迭块帆布一只小环一只小环扣了车篷前端，整个雨篷就严丝合缝，就是滂沱大雨也搭侬勿搭介了。车篷由四根弧型铁架支撑，可向后缩放到车身浪，有趣个是后面有一小块可卷起个布帘，成了一扇活动个小窗。坐垫箱内还有一件车夫个雨衣。现在提倡环保，交关人搞废物利用，多数是哗众取宠。看看迭件雨衣，全部用补了不能再补个内胎剖开，一条条拼起来，粘成一大块粉红色个橡胶片，前片长点，连带可以挂到车把前头，后面稍短，当中剪只窟窿，往头浪一套，红色里向也夹了些黑条子，外加一眼补丁，现在T台上头差勿多有学伊样子个，满满叫城市个味道。

　　小辰光欢喜落雨天乘三轮，雨点子敲打篷布，咚、咚、咚，就像钻进了桶鼓里。再配上车夫个木踏脚发出个嗒啦嗒、嗒啦嗒个声响，小人一歇歇就会入了好梦。要是晴天，星空明月，轻丝薄云，明晃晃个月亮，一路跟牢仔，穿过了梧桐树个梢梢头，也会躲到高楼后面，又连忙赶了上来。小辰光好奇，想勿通月亮为啥一直跟牢，等到了家门口月亮又勿动了。现在，大雾笼罩，加之到处高楼入云，即使再乘三轮车，也看勿见月亮了。

　　招车方式跟现在“打的”大勿一样。现在站到路旁一举手空车就明白了，有朋友开玩笑，辣拉上海大马路旁边是勿可以随意搔【zao】头皮个，你刚拿手举上来，嘎一声，出租车就停到侬跟前了。招三轮呒没介优雅，要喊，要拔直仔喉咙叫，“三——轮——车”，伊面听见了，就会飞快个蹬过来。再摩登个小姐太太迭个辰光也得亮开嗓子。嘿嘿。