小辰光，我住辣海静安区万春街87弄过街楼楼浪向，房间面积只有12平方米，阿拉屋里向有弟兄姐妹四个人，再加上爷娘，六口人住辣搿间小房间里，居住条件是邪气困难。就辣辣搿种困难个情况下头，阿拉屋里向偏偏养起了芙蓉鸟，哪能桩事体呢？

　　埃歇辰光，爷娘是双职工，天天忙得七荤八素，勿大有辰光来管阿拉兄妹几家头。但是，阿拉爷还是规定阿拉每天侪要练毛笔字。阿拉侪呒没兴趣，通常今朝写了一点点，明朝就不想写了。

　　有一天，阿拉爷拎了一只鸟笼回来。阿拉兄妹几家头侪凑过去看稀奇，我还问：“迭个是啥鸟啊？”阿爷告诉阿拉，迭个是一对芙蓉鸟“夫妻”，伊拉正好辣海孵小鸟。后来，喂搿对芙蓉鸟就变成阿拉几家头个事体了。平常可以看到雌鸟整天窝辣巢里向，雄鸟则跳上跳下找食，再嘴对嘴喂雌鸟，忙得勿得了。雌鸟嘴里有了食物，又会喂给孵出来个小鸟。迭些小鸟一天到晚“唧唧喳喳”，会“咋呼”就能多吃食，葛咾会“咋呼”个小鸟长得更加快一眼！

　　有一天，阿弟喂鸟以后忘记关鸟笼，结果雄鸟辣末生头飞了出来。阿拉几家头手忙脚乱想捉迭只鸟，呒没想到阿拉捉得急，伊逃得更急，迭个辰光门窗侪是开辣海嗰，雄鸟从窗口飞了出去，一下子就看勿见了。阿拉几家头看阿弟一付哭出乌拉个样子，也就不忍心再埋怨伊了，只好凑到一道商量哪能办。结果左想右想，想勿出办法。

　　听着鸟笼里“唧唧喳喳”，我灵机一动，讲：“要么拿鸟笼挂到窗外，让雌鸟搭仔小鸟一道‘唧唧喳喳’，或许可以拿逃走个雄鸟‘叫’回来。”其他几个人一听，侪表示同意。不管哪能，总归要试一试，死马当作活马医么。

　　决定了就去做。窗口外头有一个晾衣架，阿拉就拿鸟笼挂辣晾衣架上，兄弟姐妹轮流“值班”，想等雄鸟回来辰光捉牢伊。等啊等，辰光一点点过去，雄鸟个影子也呒没看到，几家头侪泄气了，不想再管迭只鸟笼了。

　　正当阿拉各自忙各自个事体，忽然有人喊：“雄鸟回转来了！”我奔到窗边一看，真个呀！雄鸟正立辣鸟笼浪向，“唧唧喳喳”叫。阿弟来了一看，马上就想伸手去拿鸟笼子拎回房间。我怕伊寿头八气拿事体搞坏脱，慌忙伸手拦。阿拉两家头正辣海“挣扎”，迭只鸟又逃脱了。阿拉几个小鬼头又开始互相埋怨，过了好一会儿，大家才意识到，这么吵下去是勿会有结果嗰。最后决定：还是要耐心等辣海，还是要轮流值班！功夫不负有心人，一歇歇工夫，迭只鸟又飞回来了，立辣鸟笼子上头叫个不停。

　　我让阿弟和妹妹们侪勿要过来，我一介头小心翼翼走过去，走到窗口，勿急于动手，只是同迭只鸟相互对视。过脱一歇辰光，伊好像并呒没对我有“敌意”，我屏住气息，伸出双手，拿住鸟笼，自言自语地说：“鸟儿啊，勿要动，勿要动！”嘿嘿，伊倒蛮听闲话嗰，真个呒没动！鸟笼被我拿到屋里向，阿弟、阿妹拿窗子关好！我再轻轻交拿迭只鸟抓回到笼子里！伊拉一家门终于团圆了，阿拉几家头也瞎开心。

　　后来很长一段辰光里，我总以为能有搿能圆满个结果是阿拉努力个结果。现在想起来：其实，迭桩事体是迭对芙蓉鸟“夫妻情深”个结果呀！鸟能搿能介，葛末阿拉人呢？阿拉更应有情有意，侬讲是口伐？