深山走一沓，青山绿水绕，一蓬石韭菜，看作兰花鸟。

　　广东韶关，因为有韶钢，就值得特特为为去一趟：明明是家钢铁厂，车间里弄得煞辣斯清，智慧集控中心操作台弄得像纽约华尔街证交所。

　　光是干净还就算了，开放式办公区域收作得像只大花园，春天里，樱花、桃花，还有一种叫黄风铃花嗰，一朵朵花像铃铛挂辣树浪，邪气弹眼落睛，弄得附近老百姓日常生活里多出一只新地标：吃好夜饭到韶钢去散散步。

　　当然，更加让人眼热嗰，还是韶关地方勿大，好吃物事交关。比方讲，有种长得像炮弹一样个芋艿，长相吓人，吃口倒老讨人欢喜，又细又糯。

　　回来之后，辣上海小菜场里也寻着一种长得像小型炸弹一样个芋艿，切切薄炒肉片，也邪气好吃。比方讲糍粑，完全勿像阿拉此地个糯米年糕，粘滋疙瘩，居然是爽嗰，Q嗰。

　　还有就是石韭了。一听就晓得了，应该是长辣石头缝里个野韭菜。按道理讲，野生菜总归瘦一眼，尤其还是从石头缝里蹿出来嗰，偏偏伊长得比普通韭菜阔个一两倍，应该是好山好水好空气个原因。韶关人欢喜用腊肉搭石韭一道炒，腊肉先蒸熟，精肉暗红色，壮肉透明嗰，吃饱油水个韭菜碧碧绿铮铮亮，一盘菜红红绿绿，邪气好看；搛一筷子进嘴巴，肉香夹仔菜香，爽爽脆脆，邪气好吃。

　　阿拉此地虽然呒没石韭，不过，春天里个韭菜也一样好滋好味，像辣上海隔壁头吴江老镇源个韭菜炒蚬肉，也是让人想起来就馋吐水答答滴嗰。春天头刀韭菜，跟春笋、蚬肉一道炒，绿个绿白个白，端上来侪是春天特有个颜色搭仔味道。

　　交关上海人屋里韭菜是勿进门嗰，侪讲下饭是下饭，就是味道肮三勿过。吃过以后，搿味道辣嘴巴里身浪向要盘来盘去有得一腔，所以，过脱春天，韭菜还是少吃一眼口伐。只有春天个韭菜，味道是淡淡交嗰。

　　【沪语解释】

　　煞辣斯清：非常干净。

　　粘滋疙瘩：粘牙。

　　有得一腔：有一阵子。