上海近郊个七宝古镇是我经常去白相个地方，我一般侪是辣海蒲汇塘桥左右个南大街、北大街浪荡荡看看。古色古香个老街，马路边浪叫卖个各种特色小吃个叫卖声，常常能够勾起我对江南水乡生活个回忆。 

　　七宝有个景点引起我注意，搿个就是蒲汇塘桥西北格蒲溪广场浪个避风台。迭个避风台建辣海广场个东横头，飞檐翘角，有点像古戏台个格局。根据史籍记载，七宝镇个历史可以追溯到宋朝初年，所以七宝一向有千年古镇个称号。到了明朝，七宝隶属于青浦，已经成为“居民繁庶、商贾骈集、文儒辈出个邑之巨镇”（明万历《青浦县志》）。七宝地处河港交错格水乡，客货运输主要依靠水路，而当时河面浪经常要碰着大风大浪，严重威胁船民个生命财产。为了迭个，七宝特地造了一座避风台，可以拨拉船民躲避风浪。当时青浦县个太爷叫屠隆，伊是明朝著名个文学家、戏曲家，垃拉万历七年至十年间做青浦个知县。伊认为七宝有搿座避风台，“实为利民之举”，伊还为避风台题了一首诗：“天寒雪色晕微红，自是神仙下汉宫。不是高台临太液，因风吹去碧空中”。屠隆迭个人为官勤政清廉，为民勿辞劳顿。伊曾经向上司上书，反映当地百姓个疾苦。政务之余，伊喜欢写诗写剧本饮酒赋诗。屠隆辣海青浦任县令搿段辰光，苏沪一带戏曲演出已经相当繁盛，青浦县城就有乐班能够排演梁辰鱼个著名昆曲《浣纱记》迭个戏了。 

　　七宝避风台辣海清朝道光年间曾经坍塌。到2002年个夏天，垃拉修复七宝古镇个辰光，垃拉镇北重建避风台。现在避风台兼做文艺演出戏台，演出过沪剧等。垃拉台壁浪镶嵌着巨幅大理石个石雕画《七宝金秋玩蟀图》，白底绿纹，生动个再现了金秋时节，七宝斗蟋蟀格民间习俗。垃拉避风台两旁边有一副柱联：“两袖清风游九峰三卯不误吏事；十里雨雪踏七镇八乡倾怀民情。”屠隆为官一任，能够得到清名并且传到后世，勿容易。