想想埃个辰光过春节，食品供应老紧张个，买年货侪要凭票凭证，有肉票、鱼票、蛋票、家禽票还有金针木耳、瓜子长生果咾啥侪要凭票证购买。埃歇辰光我辣海市郊农场做生活。队里胆子大点介个职工就偷偷叫用粮票搭现钞跟农民调鸡蛋、长生果、鸡鸭咾啥年货带回去过春节。

　　阿拉爷【父亲】写信来讲，要我带眼年货转去过年。看到队里部分知青到农民屋里“采购”，伊拉满载而归，我也想去试试看。队里一女职工像煞搭搿家农民阿婆蛮熟个，一歇工夫，“交易”就成功了。伊用粮票搭现钞问【men】阿婆调到了鸡蛋、长生果满满一袋。我当时交关震动，要晓得票证交换是违法个，勿过伊拉倒是笃悠悠个勿慌勿忙。过了几天，阿拉爷又来信催我了。我就一家头背了只当时行【hang】个人造革“马桶包”，去埃个阿婆屋里。阿婆看我一个人来，交关热情，伊拿出来鸡蛋、长生果、瓜子咾啥。临走辰光，又看到门前场地浪有几只母鸡，其中一只身浪向芦花颜色样个小母鸡，我就问伊要买，伊开头勿舍得，但我诚心要，也只好忍痛割爱了。我胆子小，就用现钞搭少许粮票拨拉伊。阿婆晓得我是上海知青，也下勿了手“斩”我，落得上路一记了。

　　阿拉娘【母亲】看到我带介许多年货转来，邪气开心。当伊看到还有一只芦花鸡，更加笑得合勿拢嘴巴。伊垃拉八仙桌下头用木板拦起一只“鸡棚”，拨鸡关拉里向。

　　年夜头了，娘磨刀霍霍，要拿芦花鸡开刀。辣陌生头伊叫了起来：“一只蛋，一只蛋！”原来芦花鸡生蛋了，乃末娘勿肯杀鸡了。要晓得，埃辰光鸡蛋供应紧张，发下来个蛋票只好买一块冰蛋。现在有只会得生蛋个鸡，搿勿要忒开心噢！

　　春节到了，亲朋好友，邻舍隔壁到我屋里来，伊拉交关惊喜，眼热阿拉有介许多年货。现在回想起来，心里向倒还有一种讲勿出个特别味【mi】道唻，也蛮感慨个。