大家侪晓得，有眼字辣上海闲话当中因为文读、白读个关系，有得两种读音。不过，也有眼字有得几种读音，搭文读、白读勿搭界。

　　比方“阿”字，辣上海方言当中用辣亲属称谓个前面，但是有三个读音：勒海“阿太”、“阿奶”、“阿爹”、“阿伯”、“阿妈”、“阿哥”、“阿姐”、“阿弟”、“阿妹”、“阿嫂”、“阿侄”等称呼中，“阿”是一种读音（入声）；辣海“阿爷”（祖父）、“阿娘”（祖母）迭两个称呼中，是另外一种读音（也是入声）；而辣海“阿姆”（母亲）、“阿姨”、“阿叔”等称呼中，是第三种读音（非入声）。勿同个读音还有区分语义个作用，比方“阿婆”迭个称呼，假使“阿”是第一种读音，是老婆称老公个娘；假使是第三种读音，就是泛称老年妇女了。再比方“阿舅”迭个称呼，假使是第一种读音，是老婆称老公个兄弟（上海人也叫“舅老爷”）；假使是第三种读音，就是外甥叫舅舅了。迭三种读音当中，第一种读音用得最广泛，比方“阿大”、“阿王”、“阿囡”、“阿乡”、“阿翘”（瘸子）、“阿飞”、“阿乌”、“阿戆”、“阿木林”、“阿屈死”、“阿胡子”、“阿福果”、“阿胡卵”、“阿猫阿狗”、“阿拉”、“阿末”等当中个“阿”，侪是第一种读音。“阿唷哇”当中个“阿”是第二种读音，“阿呜一口”当中个“阿”则是第三种读音。还有一个“老”字，辣海一般情况下头侪读“牢”，但是“老兄”（含贬义）个“老”有辰光读“捞”，而且勿晓得从啥辰光开始，“老师”个“老”也读成“捞”了。“波”辣海上海闲话里一般勿读入声，但是辣“宁波”迭个地名里读成入声（音同“北”）。究竟为啥要异读，讲勿出道理，我看只能讲是约定俗成了。