上海人每年过年侪要请财神老爷，财神老爷啥辰光离开个，呒没人晓得个，但每年侪要请。

　　请财神是辣正月初五个零时开始（农历为子时三刻）。老早子辰光，交关人家从年初四就开始做好准备仔。顶重要个是要买一条新鲜个鲤鱼，搿个请财神个必须要准备个，因为“鲤”搭“利”读个声音相近，“鲤鱼”就是“利余”，搿是生意人家，最欢喜听到个吉利话。又由于“鲤鱼”个身体形状邪气像“元宝”，故又称伊元宝鱼，葛末拿仔“鲤鱼”请财神，当然是顶顶适合个。乃末有些个卖鱼人家，就想出花样经来：用红丝线扎牢个鱼鳍，一家家叫卖，大家称“送元宝”，买个人家讨得仔好口彩，卖鱼个人家，当然获得仔更加多个利润。年初四个午夜（即初五零时）请财神仪式开始，炮仗个声音响彻仔夜里向个天空，一直要响到年初五个早浪向。

　　清代秦荣光有一首描述请财神个热闹情景个上海县竹枝词，词曰：“拜年末了接财神，爆竹通宵闹比邻。鲤鱼羊头增价倍，哪知穷汉甑生尘。”现在，特别个买条鲤鱼请财神老爷，应该讲已经老少了。但是年初五个零点，放爆竹个习俗仍然延续勿衰。