热水瓶，一定是上海人，家家屋里必备个日用品。上个世纪五六十年代，虽然物资供应短缺，大多数人家生活条件侪比较推扳，但是自来水供应总归保证个，要想吃一口热茶（上海人喝白开水也叫吃茶），还是呒没问题个。我记得老清爽，小时候吃热茶个辰光，屋里大人总是要把开水倒了杯子里，等水勿冷勿热刚好可以吃个辰光，才肯交到阿拉手里。侬覅讲，老底子热水瓶个质量还真是好，隔夜冲下去个水，到第二天早浪起来，热水瓶里个水还是涾涾潽、滚滚烫。

　　当时大部分热水瓶个外壳是竹壳个，后来有了一部分搪瓷铁壳个。我好几趟辣拉描写解放前故事个电视剧里向，看到出现搪瓷铁壳热水瓶个身影，真佩服搿些导演、美工个“穿越”水平。而铝壳喷漆个，是上档子个，一般新婚夫妻结婚辰光，侪要买一对摆了新房间里；特别像当时个“向阳牌”铝壳热水瓶，红色个保温瓶外壳浪，喷绘着一朵盛开个牡丹，呈现出吉祥富贵、喜气洋洋个感觉，成为众多新婚夫妻首选。当然咾，有种小夫妻偶尔寻相骂个辰光，也欢喜用掼家什来显示自己个威力；有种人就是欢喜掼热水瓶，假使搿只热水瓶里正好装满开水就更好了，掼到地上，“嘭”，玻璃壶胆破碎遍地，“滋”，地上冒起一层热气，简直就是一件威慑力十足个“原子弹”。

　　不过事体过去后，伊拉肯定也蛮后悔个！

　　要讲后悔，我个亲戚碰到一桩事体，可以讲“空前绝后”。

　　粉碎“四人帮”以后，我辣拉新疆兵团工作个一位亲戚，要结婚了。伊兴冲冲赶到上海采购新婚装备，主要还是紧缺个日用品，其中就有铝壳热水瓶、米老鼠奶糖、花生牛轧糖咾啥。临走个搿日，我陪伊到北站，买仔一张站台票，帮伊一道拿行李轧上有“强盗车”称号个51次列车。我再三关照，两只热水瓶一定要当心。伊讲侬放心，两只热水瓶我捧了手浪，捧到乌鲁木齐，总呒没问题了伐？我想，搿只脑子被伊动得出，服帖！

　　几天以后，我个亲戚搭我打来长途电话，除了感谢我个帮忙以外，邪气痛心个搭我讲，一对热水瓶，敲碎了！

　　原来，伊上了火车以后，虽然是卧铺，但是伊一路浪只要勿是吃饭、上厕所，就拿搿对热水瓶捧了身浪，生怕打碎脱。火车经过南京长江大桥、穿过郑州、西安，翻越秦岭山脉、走出玉门关外……足足经过72个钟头，终于到达乌鲁木齐。当伊背背大包、肩搭小包、手捧热水瓶走出车站，看到来接伊个未婚妻个辰光，一阵激动，张开双臂冲向未婚妻，只听得一声“空”（因为呒没水，声音勿是“嘭”），千辛万苦捧了三天三夜个热水瓶，最终还是……瓶碎了，热水瓶外包装浪向“避免激烈震荡及碰损”个使用说明，深深个刺痛了伊个心！

　　现在进步了，大部分家庭侪配备了电热饮水机，只要接上电源，24小时为侬服务，用勿着拿冷水放辣炉子浪烧，也用勿着拎仔热水瓶倒。但是，媒体个爆料，让大家对吃到肚皮里个“净化水”产生疑惑：原来净水机个二次污染介结棍，阿拉自己个肠胃，倒变成了“净化机”。

　　想来想去，还是老办法最灵光：烧水，辣炉子浪拿水烧得滚开滚开，冲进热水瓶，想吃就吃，吃得又放心。

　　再讲还有啥物事能够像热水瓶一样，表面冷、内里烫。有辰光，就算天老冷，就算人老孤独，只要从热水瓶里倒出一杯水，水是滚烫个，用手捧着，一歇歇辰光，浑身侪热了，心里个殟塞，也就勿觉着了。