上海人吃早饭欢喜吃饭泡粥。饭泡粥，顾名思义即是白米饭加了水再煮一煮烧成功了粥。再便当一点，冷饭用开水一冲一泡，就是泡饭了。早浪向吃泡饭，过油条，爽口。再考究一点的，剥只咸蛋、搛点肉松。如有邵万生个黄泥螺来下饭，那就是高档生活了。上海人拿【no】饭泡粥个意思引申开来，用来形容一个人讲闲话啰嗦、讲闲话勿得要领。特别是用辣打电话上，北方人讲是泡电话，上海人会讲侬饭泡粥，烦煞了。

　　国人拥有个电话——当然是指手机，绝对数天下第一，相对数领先世界。也就是几年之前，上海地铁里还偶见乞丐。一个破衣烂衫个小姑娘，十四、五岁模样，摇着空纸杯辣车厢里乞讨零钱。走到我面前，我犹豫中。“大叔，行行好吧，我一天没吃过了！”忽然手机铃响了。我正要摸手机，铃声断了。抬头一看，那个小乞丐已经掏出手机接上电话了。伊还百忙里应我一声：“不好意思，大叔。我通个电话……”瞄了一眼伊个手机，还相当新款。我后来没行善。我也不勿好意思。我个手机更加老式。

　　说远了。说近一点，我个问题是辣地铁车厢里、辣公交车上能勿能打电话、通电话。搿个比辣地铁车厢里，辣公交车上能勿能吃东西喝饮料个课题要高出一点层面。辣海外，搿个问题早有答案。辣公共交通个车辆里都有醒目个标识：禁用手机。图案是与禁吸烟个标识相近，一支点燃个香烟换成了一部手机。呒没人打手机。上车前大家都把手机设置于振动。如果有电话打入，可以发一短信给对方：“地铁中。稍后联系。”辣车厢里保持安静搿个是公德。

　　我们呒没搿样个规矩，也就呒没搿样个习惯。车厢里打电话个朋友前仆后继。要有要紧个事体也就算了。但勿少朋友是无事生非，拨只电话来解解厌气。东家长、西家短是只电话。天气好、天气坏，是只电话。上班忙、上班空，是只电话。饭泡粥泡进了地铁里。还常常碰到借电话来掼浪头个脚色：“喂，侬听清爽了，通告财务划500万到我卡里，我看中一套房子……”嗓门瞎大，大家听到。唉，上海个“李嘉诚”坐进了地铁，弄勿懂。有一趟碰到搿样个朋友，我气勿过也来装一记海威，我摸出手机：“喂，老张，侬欠我个500万欧元好还拨我了，听清爽……”满车厢个人也看牢我：又来了一个“霍英东”勿成？先前掼浪头个立马呆脱。

　　开车子勿好打电话。骑车子勿好打电话。乘车子也勿好打电话。我希望搿个有一天会变成阿拉个风气，而勿仅仅是强制个规矩。