小辰光听到过一只童谣，“山浪有只老虎，老虎要吃人，拿伊关辣笼子里，笼子坏脱，老虎逃脱，逃到南京，买包糖精，摆辣水里浸一浸，密西密西拉胡琴”。搿辰光就垃拉想，到山浪去打老虎是哪能样子？后首来大了，晓得上海滩是呒没老虎个，要看老虎，只好去西郊公园。

　　前腔有空翻书，真叫是勿看勿晓得，一看吓煞人。原来老底子个上海滩，真个有过老虎，外加还交关多唻。史书里向记录个顶早个上海滩老虎个辰光大概是500多年前头个1437年。迭年宝山闹虎灾，老虎成群，一记头吃脱65个人，有道是“居民号恸死不辜，哭声夜半于穹苍”，老百姓真叫是罪过！总算是衙门也看勿下去，派兵上山打虎，迭个辰光，也呒没啥“动物保护条例”，拿老虎打杀个，是“模子”。至于只老虎个品种么，史书上叫做“苍身白额”，现在看来就是华南虎了，嗯，就是前两年陕西“周老虎”趟事体个主角。

　　按照史书浪讲法，现在上海北部个嘉定搭仔宝山，南部个金山搭仔松江，是老虎活动顶多个地方。为啥体呢？因为搿眼地方当时湖浜多，树林子也多。老虎交关欢喜蹲了迭种环境里向。直到几百年后个清朝辰光，上海滩还是有老虎个，1658年，金山有只老虎比较结棍，追一群马追进了金山卫城里向，去捉伊个士兵死脱四个，结果还是拨搿只老虎“咆哮而去”，也真是呒没闲话讲了。

　　大概从乾隆年间开始，史料里向上海有老虎个记载是越来越少。想想也是，原来个河浜拨填埋，本生个树林拨砍伐。自然环境拨改造成片片良田，一望无垠。连得老虎囥个地方也呒没了，哪能还生存得下去？乾隆三十二年（1767），有只老虎估计是实在垃上海滩混勿下去，沿牢苏州河（吴淞江）从青浦往西跑，昼伏夜行，屡次伤人，老百姓群起打虎，一直追到隔壁昆山地界，总算打杀了迭只老虎。从此以后，史料浪向再也寻勿到老虎到此一游个记录了，作兴上海滩浪末脚一只土生老虎，已经拨“跨省”打杀垃昆山……现在上海动物园里向个老虎，勿管是东北虎华南虎还是孟加拉虎，统统侪是后来从外地捉来个，上海滩浪，早已无虎。