医院内科病房。浦东姆妈睏垃316床。伊生个是脑梗，邪气严重，手脚侪呒没知觉，面孔浪呒没表情，勿讲闲话，人家讲闲话伊呒没反应，有辰光睁开眼睛看看，也勿晓得伊看见了啥物事。床旁边架子浪盐水瓶一滴一滴，垃一秒一秒个拖延伊个生命。医生讲，勿可逆转。可伊个儿子讲，等待奇迹。

　　儿子三十多了，到现在呒没对象，姆妈生病住院后，索性拿医院当屋里，每天一下班就到病房来护理姆妈。伊拉牢仔姆妈个手，贴垃姆妈个耳朵边讲讲闲话。夜里，就扑垃姆妈个床沿眠脱一歇。伊天天搿能坚持，搿能盼望，一声声“姆妈”亲得来，拿病房里其他病人个心侪叫得发热。

　　隔壁317床是宁波外婆。伊心脏有病，不过程度蛮轻，好得牢快。一个疗程下来，已经好坐起来自己拿调羹吃粥了。外婆精神一好，就有点瞎作，对住院后一直护理伊个囡儿勿满意起来，勿是怪手脚重，就是嫌茶水烫，吵到调来外孙女，才平心静气。

　　一个月后，浦东姆妈个病情一眼也不见好转。宁波外婆已经拨外孙女搀扶，好下床走动了。又一个月后，姆妈仍旧闷睏，外婆出院了。

　　外婆出院后，外孙女照常天天朝医院跑。介许多日脚下来，大概是习惯了。一日天，姆妈睁开眼睛，眼珠慢慢较转动，好像是垃寻啥个物事。儿子叫仔声“姆妈”，伸手轻轻扶起伊，拿枕头填高一点。外孙女也叫仔一声“姆妈”，拿伊额角前个头发朝后理理齐。姆妈看看儿子，看看外孙女，眼睛“忽”一亮，长长透仔一口气，又睏着了。伊睏得牢牢深，呒没再醒来。