垃拉勿少反映老上海个电影搭仔电视剧当中，侪有关于霞飞路个镜头。

　　1901年，上海法租界公董局“越界筑路”，铺成迭条马路：开头个辰光，叫做西江路；过仔五年，更名宝昌（公董局总董名字）路；1915年，根据一位法国将领个名字，改称霞飞路。

　　上世纪三十年代，霞飞路已经是排垃拉南京路后头个上海繁华大街。侨居上海个犹太人垃拉迭条商业街开仔交关店，搿里向有勿少名气来得响：奥地利籍犹太人汉斯·雅布隆纳垃拉霞飞路997号开“费雅客”菜馆，聘请外国厨师做维也纳搭仔匈牙利风味个菜肴；意大利籍犹太人路易·罗威垃拉霞飞路、亚尔培路（今陕西南路）口开“罗威饭店”，经营法式搭仔意式西餐，伊拉个法式传统菜“洋葱汤”味道比人家个“罗宋汤”好；一位法籍犹太人搭仔别个老板合作垃拉霞飞路、贝谛鏖路（今成都南路）口开“老大昌”面包房，采取前店后厂个模式，主要做法式西点，糕饼制作精细、奶香浓郁，成为食品行业个知名品牌；俄籍犹太人阿依达·拉宾诺维奇夫人垃拉拉都路（今襄阳南路）、霞飞路口开儿童用品商店，而且用一部儿童剧个主角“彼得·潘”命名，营销各种各样新颖个童装、别致个文具、有趣个玩具，对小囡邪气有吸引力；俄籍犹太人图钦斯基垃拉霞飞路829～831号开“欧罗巴皮鞋公司”，经营各种各样海外名牌产品；俄籍犹太人格利高里·克列巴诺夫本来垃拉东北做皮货生意，后来到上海静安寺路（今南京西路）开“第一西比利亚皮货店”，因为业务老快扩大，就又垃拉霞飞路895号开分店。埃个辰光，搿眼店家生意侪蛮好个，据说美国个麦克阿瑟将军到上海，也逛过霞飞路，垃拉“费雅客”菜馆一饱口福。

　　霞飞路是上海比较早就造公寓搭仔新式里弄住宅个地段。搿里向邪气出名个，譬如培恩公寓(今淮海中路453～457号)、乐安坊（今淮海中路613弄）、霞飞坊（今淮海中路927弄）、新康花园（今淮海中路1273弄）咾啥。搿歇，沿路还可以看到勿少有特色个老房子，伊拉构成了一道都市风景。

　　另外，霞飞路作为上海法租界个黄金地段，迭搭块除脱出现交关娱乐场所，还造起西式个公园，搿里向有凡尔登公园（今淮海中路、茂名南路拐角处）、宝昌公园（今淮海中路、复兴西路、乌鲁木齐路三岔路口）、杜美花园（今淮海中路、东湖路拐角处）咾啥。

　　后来，霞飞路又两次更名：垃拉沦陷时期，曾经改称泰山路；抗战胜利个辰光，叫做林森中路。上海解放以后，为了纪念淮海战役，拿伊定名为淮海中路。外地游客到上海，一般侪会逛“淮海路”，就是常熟路以东搿段淮海中路，因为伊是比较雅致、韵味别具个商业街。