勿是高峰时段，公交车上人人有座位可坐。上来一个时髦姑娘，辣前车门坐定。伊从包里摸出一副大饼油条，叭嗒叭嗒享用起来。半个车厢个乘客行注目礼，看伊吃早点。要是辣老底子，一定会有上年纪个人来劝伊坐车子就勿要吃东西了。现在，呒没。辣车厢里个吃喝之风是从地铁里刮起来个。地铁站外常常有赶了就跑、跑了再来个小吃摊头，因此进地铁车站个勿少朋友或拎一包豆浆、或握一团粢饭，边走边喝、边走边吃。轧进了车厢，吃喝继续，旁若无人。更有不识相个一旦坐到位子，就来一段休闲生活，嗑嗑瓜子、剥剥栗子，弄得果壳一地。我弄勿懂，伊辣自家屋里向也会搿能样子吗？

　　老上海人讲究个礼仪修养里，有“坐有坐相，立有立相”一说。见了长辈师长，坐要端坐，还只可坐半个凳面。勿可跷起二郎腿抖抖豁豁。立要端正，不可东歪西斜、七歪八牵。勿可东依西靠、懒懒散散。屋里向做好了规矩，踏上社会就有了样子，是个有教养个人了。辣地铁车厢里坐到座位，一样是不可以搁起二郎腿个。搿是礼貌。搿更是为方便车厢里过往个其他乘客。到国外旅行，只要能见到车厢里搿样个“休闲”朋友，几乎可以肯定伊一定是阿拉个同胞。伊勿难为情，我倒难为情了。唯一可以原谅伊个，是因为伊勿懂，从小到大呒没人来教育过伊搿点日常生活中个规矩。作孽作孽。

　　辣地铁里可勿可以吃吃喝喝，眼门前还辣讨论中。持“吃喝随意”观点个认为如今是高节奏时代，要尽可能个节约辰光。辣车厢里吃，辣电梯中喝，代表了生活个快捷。侬是快捷了，侬是方便了，侬是爽快了，只是侬忘记脱了侬是置身于大众之中，置身于社会之中。要来听我个意见，一句闲话：凡禁止吸烟个场所都勿应该随意吃喝食品饮料。当然，饮食行业场所勿辣此列。

　　有坐相、有立相，还要讲究个是吃相了。吃相，吃喝个样子。国人关于吃相个评判有交交关关。有民族个、有地域个，还有场合个。迭个题目是可以送到百家论坛上去请专家上课个，每个时代个吃相勿尽相同个。每当我看到有西装革履个小白领辣地铁里啃大饼，看到亭亭玉立个小姑娘辣电梯里咬串烧，我是有点头晕、有点厥倒个。搿个难道就是阿拉跨时代个新吃相吗？如此，我只好把原本要出口个一句上海闲话咽下去：“谢谢侬一家门！”上海闲话“吃相”个另一解释：与人吵架、发脾气个脸色与架势。“侬个吃相实在太难看了！”迭个当口，吃相与吃喝无关，只与侬个态度相关了。吃相重要可见一斑。