上海话个正字问题现在已经引起大家个严重关心，辣报纸、电视、网络、微信里向，常常出现上海话用字个错误，老多人希望我重点讲一讲搿个问题。

　　我国历来重视书面语用字字形统一，“书同文”就是讲书写文字必须一致，也就是讲每个字应该用同一个字形，勿要一个字乱用多种写法。任何语言个文字侪要标准化。

　　有人说讲，上海话是口语，有音无字。其实吴语书面语老早就有几百年个文献，用字早已约定俗成，只是一段时期里有眼人看勿到吴语、上海话个书面文字，就误认为呒没文字了。1900年上海个西方传教士正式出版过一本《汉英上海方言字典》，收7779个字，侪注有文读音、白读音；20世纪初辣上海出版个《旧约、新约圣经》上海话、苏州话版本中呒没一个字写勿出写错。考证确定大量词语写法，从清朝语言学家嘉定人钱大昕就已经开始。

　　上海话绝大多数词语用字，沪语搭吴语个方言学界辣上世纪70年代底就开始集中搜集，悉心考证，确定标准写法，成果见于80年代出版个《上海市区方言志》，而且已长久辣中国社科院语言研究所主编个《中国语文》《方言》等核心刊物浪向通用。

　　阿拉从阿里几个方面来审定上海方言个用字呢？

　　1.词语有相当大个一批是吴语通用词，从明末起已开始约定俗成。考订时，选择有辞书根据、最广泛使用、音义辣各地侪准确对应个用字，为标准字，譬如：落苏、度死、促掐、里向、浪向。像“促掐”，原辣元朝杂剧搭《水浒传》中侪搿能写。

　　2.有交关词北方话里勿用了，但吴语里还普遍用，就用“考本字”个方法主要辣《广韵》《集韵》《玉篇》搿三本最权威个辞书中考出声韵调侪严格对应个字。搿些字形勿见于普通话，所以看上去比较生僻，但一定要确定搿些字为标准写法，方才能为吴语广大地域所接受通用。因为查之有据，各地勿同个俗字辣各地人员坐下来讨论辰光必定勿取。如表示倚靠义个“隑”，上海曾有俗字“戤”，就勿可能通过。搿类字有：隑ghe（靠）、渳 ’mi（小口喝）、恘’qiu（坏）、殟wek塞（郁闷）等。

　　3.虚词（包括代词、指别词、副词、介词、助词、叹词）各地读音邪气勿一样，则应严格用上海话中个同音字来写，用字考虑到约定俗成，用老派音、新派音皆可读准个字。譬如：“搿个、埃面、辣辣（垃拉）、辣海、邪气、定规”等，勿用本字。“垃拉”为传教士等所记个上海话通用，其音现在辣郊区用得多；“辣辣”是赵元任记上海市区话标准音用字，“拉”和“辣”也为申曲等唱片个唱词说明书中常用。又如：“个（的、地）”个用字，是语言学界有公认个“本字”，至于“格（的；这）”、“勒（在）”等搭苏州音对应，上海音并勿对应个字，就勿用。

　　4.有个词，确实有音而考勿出本字，就取常见个俗字，但必须是上海话中个完全同音词，如“茄山河”、“茄门”、“茄搭搭”中个“茄”，就是用“番茄”个“茄”。

　　上海话当中绝大部分个考定个正字，已经辣《上海话大词典》（上海辞书出版社）中全部排出，可供查阅。搿部词典中勿能排出个字，即上海话中真正有音无字或过去写法勿一而未确定个字，经当时搜集一共有52个字，辣2008年第二届国际上海方言学术研讨会浪，上海方言学家会同松江、苏州、杭州、南京、香港及法国、美国等地方言学专家、文字学家，一一进行讨论，最后确定了专家推荐个规范用字，勿少字取以前吴语文献中用得频率高个或意义浪比较恰当个，如作“讥讽”解个“钝”，作“剩留”解个“挺”，作“脾气犟”解个“艮ghen”。搿点字将放进勿久重版个《上海话大词典》修订本中。上海话书面语就基本上呒没写勿出个字，而且全部侪可以辣电脑字库（包括扩充字）里打得出。希望大家多查词典大家来正字。

　　“上海话前世今生”系列至此结稿。