我年轻辰光，住在这幢老房子里，无论是前楼好婆、后楼老爹，还是亭子间嫂嫂、客堂爷叔，侪晓得我是个急性子，用伊拉的话来讲，就是“走路像跑，吃饭像倒，讲话像吵，做起事体双脚跳”。不过，老邻居到底厚道，晓得我生肖属马，就“兜圈子”用一只歌名来提醒我：“马儿呀，侬慢些走！”

　　其实，我对自家的快手快脚的个性倒蛮“兮格格”的。因为当时马路浪向到处侪是“超过英国，赶上美国”“一天等于二十年”之类标语，即使侬是个“石骨铁硬”的慢性子，也会觉得自己迭种个性好像做仔啥“见不得人个事体”一样。就拿“马儿呀，侬慢些走！”迭只歌来讲，是歌唱家马玉涛个代表作，唱起来邪气好听！想不到有人要“硬敲”这只歌，讲这首歌与“时代精神”唱反调，是叫大家“磨洋工”。真是瞎三话四！

　　到上世纪80年代，“时间就是金钱”，人人变成“急性子”，快速成名、一夜暴富、速成减肥、爱情速配……再后来，“快”也不够了，还要“闪”，啥个“闪恋”“闪婚”“闪离”“闪旅游”“闪聚会”……

　　啥人晓得再后来，行情又统统变脱了。大家发现，现代人虽然晋身为物质的富人，却沦落为时间的穷人。《中国青年报》作过一项社会调查，84%的人认为自己生活在“加急时代”，其中71.1%的人称，自己“精神高度紧张，压力大，丧失了幸福感”。

　　人类，真是一种奇怪个动物。当生活在“温吞水”农耕时代，就会挖空心思追求高速状态；等到“大干快上”出现在眼门前时，阿拉反过来会去怀念老早陶渊明老先生“采菊东篱下，悠然见南山”个“慢生活”了。

　　现在，已经有人开始眼热蜗牛和乌龟了，要向伊拉看齐，慢慢吃，慢慢走，慢慢看，慢慢思考，慢慢享受人生，即使读诗也要读李清照的《声声慢》……我最喜欢的捷克作家米兰·昆德拉写过一本小说，名字就叫——《慢》，伊开门见山就问侬：“慢的乐趣哪能失传了呢？”

　　最近，我偶尔碰到30多年呒没见面的老邻居，伊拉一见面就对我唱“马儿呀，侬慢些走！”我懂得伊拉是辣“豁令子”：阿潘啊，侬头顶心已经有“荷包蛋”，眼角皱纹木佬佬，不要再像年轻辰光急出乌拉个卖相了……

　　是的，我应该让自家奔跑的脚步慢下来，紧张的节奏缓下来。比如，勒车站浪候车，看见车子来了，明明只要紧走几步就能乘上去，我偏偏笃悠悠慢吞吞，眼睁睁让车子开脱；再比如，到剧场去看戏，老早仔总是克足辰光才动身，现在提前一倍辰光出发。我决定从咪咪小事做起，目标是——“吃饭要细品慢嚼，走路要笃定逍遥，讲话要有‘标点符号’（停顿）”。