讲起我欢喜打桥牌已经接近60年了。记得那年放暑假，我经常到淮海公园，读读书，看看人家画画写生，辣辣树荫底下望望野眼。有一趟我到公园茶室，看见一张桌子围着交关人。伸头去看，原来是四个人辣辣打牌，后来一问才晓得是打桥牌。我看搿四个人打牌规规矩矩，安安静静，正襟危坐，邪气有风度。内中一个人穿长袖衬衫，还戴了一条领带，现在个讲法就是老有绅士风度个。我一下子就喜欢上了桥牌。

　　搿息辰光桥牌勿是交关普及，呒没场化学，刚巧一个同学辣辣交大读书个阿哥会打桥牌，后来就到交大学生宿舍练习，也到过杭州外语学校跟教师打过桥牌。工作后，打桥牌有点心得，就搭仔几个朋友经常聚聚，切磋牌艺，坚持了好多年。

　　后来进了新闻单位，打桥牌个机会相对多了，也觐见了好多像王俊人、唐家两兄弟等桥牌大师，有幸观赏了桥牌女皇杨小燕高超技艺搭仔风采。我辣辣单位里还担任桥牌协会秘书长，经常组织桥赛，辣辣锦江小礼堂举办过几次中外名人桥牌邀请赛，还到过丹阳、南昌、宁波等地代表单位参加友谊赛。

　　虽然我打桥牌时间勿短，不过桥牌水准一直辣中游徘徊，停滞不前，因为我打桥牌个天赋不够，喜欢打桥牌只是我认为迭项娱乐或者讲运动（现已定为智力运动，经常有国内国际比赛），对于提高文化素质、文明修养交关有帮助，所谓个修身养性嘛。勿像搓麻将、“斗地主”那样急吼吼，吃相蛮难看。

　　近几年来，桥牌游戏渐渐普及了，有些学堂里也开办桥牌培训班，组织学生打桥牌，提高伊拉智力、协作精神，以及礼仪修养。可以讲打桥牌的确是一门老小皆宜个智力运动。笔者现在还经常搭老同学玩玩桥牌，一方面叙叙旧，另一方面调养身心，何乐而不为呢？