心里一开心，开车到吴江，

　　一杯碧螺春，一碗红汤面。

　　吴江就勒上海边浪向，80多公里，从屋里开车过去也就一个钟头多一眼眼。

　　有趣的是，苏州、木渎、昆山……常去，就是吴江从来呒末去过。有种事体，硬劲想是想勿明白了。

　　最近居然去成了，结果就碰着吴越美食推进会创始人，土生土长吴江人蒋洪老师。蒋老师是吴江美食界的大佬，跟伊一道走勒吴江某条美食街哴向，一路走过去，一路有人跟伊打招呼。看得出来，此地人侪当伊自家爷叔、兄弟一样，老热络。

　　覅看蒋老师写书作文博客公号白相得不亦乐乎，完全是一派学者文人腔调，偏偏伊还是烹饪大师华永根的入门弟子，自家徒弟还纷纷战斗勒吴江餐饮界第一线，听听就是个十足有趣的人。

　　但搿日顶顶有趣的是，跟蒋老师走到伊大徒弟开的“老镇源”门口，碰着熟面孔了，一开口，一讲闲话想起来了，十几年前头碰过头，勒吴江再次碰头，好像时光倒流，跟昨日碰着过一样。

　　蛮有趣个，有种地方，有种人，是缘分，总推勿开。