一夜西风舞，满地尽翻黄；晶莹未肯枯，为等白果熟。

　　“一叶落而知天下秋”，只勿过，上海现在秋天勿秋，冬天勿冬，春夏秋冬之间总有点牵丝扳藤分勿清爽。

　　比方讲，前段辰光，小区里个桂花又开了。不过呢，到底是冬月里了，香气常常是辣一夜冷雨里，逃之夭夭。

　　比方讲，整个城市有好几天几乎侪拨银杏叶罩辣海，辣树浪向，伊金光锃亮，辣地浪，伊玉骨冰肌。李清照写伊：谁怜流落江湖上，玉骨冰肌未肯枯。

　　覅以为写出“莫道不消魂，帘卷西风，人比黄花瘦”格种句子的人，是个整天唉声叹气的小女人，其实，李清照绝对是个女汉子。伊告诉阿拉，何必去怜惜银杏叶漫天飞舞，流落江湖，侬看看伊，从来就是一副玉骨冰肌个样子，赛过从来就呒末枯萎过。

　　是个呀，对于大自然里个落叶飞花，阿拉用勿着伤感，只要顺了风风雨雨欣赏伊就好。

　　再比方讲，辣辣小区绿化个一片老绿里向，一蓬枫叶红得弹眼落睛。早浪买菜回来，立停一歇，拍张照。一个阿婆齐巧走过，伊讲：“真好看哦。”“是呀！”回头朝伊笑笑。

　　好看物事总归迭能，只要侬想要看伊，伊就辣眼门前。

　　【沪语解释】

　　赛过：好像。

　　齐巧：正好。

　　立停一歇：站一会儿。

　　迭能：这样。