前一抢，我作为评委参加了中小学教师资格证个面试。考场里有几只镜头实在让我难忘。

　　“评委老师好！”抬头一望，一个有点驼背、上了点年纪个考生走了进来。我心里嘀咕：介大年纪还来面试，啥额路道经？

　　面试开始。两个必答题，回答中规中矩。开始试讲，伊个普通话讲得勿大标准，不过，伊辣黑板浪个板书倒邪气认真。试讲结束，我熬勿牢心里个好奇，问伊：“考生，我想问问侬，为啥要选择教师迭个职业？”

　　伊想了一歇歇，抬起头，轻声细语讲：“我是随军家属，2004年来上海。一直辣学堂里做生活。课堂里交关小囡个家长是外来务工人员，伊拉年纪已经蛮大了，读书呒没读几年，有辰光做作业还要我手把手教……”讲到搿搭，伊眼圈红了，停了停，低下头，又讲：“现在形势需要，我有紧迫感，辣学堂里工作个辰光不会老长了，我希望自己能再多做几年，我真个老喜欢小囡嗰。”

　　“老师好！”一个年轻姑娘走进考场。面试开始，两个必答题，伊答得蛮好。接下来试讲：“今朝，我上一年级个课文，题目是《画》。”刚刚讲了一歇歇，辣末生头，伊停下来了。阿拉三个考官侪面面相觑。根据考场规矩，考官勿可以做任何提醒。阿拉只好默默等待。“老师，不好意思，我讲勿下去了。我放弃。”伊挥了挥手，转身离开考场，动作看起来居然还有点潇洒。

　　我猜伊大概只想弄张教师资格证，好辣辣礼拜六礼拜天出去做家教。

　　电脑屏幕上又跳出一个名字，看起来居然是一个男同胞。我心里想：啊哟，小学教师一直阴盛阳衰，能看到一个男同胞勿容易啊。对于迭个考生，我不由有了一点期待感。“老师好！”一个戴眼镜个小个子男生走进考场，开始试讲。可惜伊基本浪就是辣自说自话，完全呒没同学生进行互动。我心里向叹了口气。看来，教师迭个职业还真不是随便啥人侪能做嗰。