老话说，啥年纪做啥事体。这句闲话老有道理嗰。年纪轻个辰光一门心思干事业，勿晓得疲劳；年纪大了，做事体就要悠着点。年轻辰光欢喜读书，勿晓得爱护眼睛；现在老眼昏花，看书越来越吃力。按理讲，老年人应该选印刷字体大一眼，内容也更有“内涵”一眼个图书。但是我反而更加欢喜看“小人书”，一是图文并茂，二是“小人书”充满童趣，仿佛拿我带回到童年辰光。

　　我屋里有一套漫画书《父与子》，一直摆辣书橱里，前两天翻出来，温故而知新。哦哟，特别有味道！搿套漫画书由德国漫画家埃·奥·卜劳恩创作，上世纪曾经风靡全球，受到各个国家大人和小囡个喜爱。

　　对我来讲，特别欢喜搿套书个原因是，我从书里向勿少故事里看到了自己个影子。比如“引人入胜的书”里，姆妈烧了一台子好菜，香气扑鼻，爸爸馋痨虫也要爬出来了，就是勿看见儿子来吃饭。儿子哪能还勿过来？爸爸一面孔怒气，去寻儿子兴师问罪。结果看到儿子趴辣地浪向，全神贯注辣辣看书。爸爸好奇，是啥书让儿子废寝忘食呢？伊走过去，弯腰朝地浪向个书看过去……接下来，儿子搭仔姆妈一道坐辣饭桌旁边，儿子闻香味已经熬勿牢了。爸爸哪能还勿来吃饭呢？姆妈叫儿子去看一看。儿子推开门，看到爸爸趴辣地浪，两只手托牢下巴，看书看得出神，样子和儿子刚刚一式一样。儿子喊：“阿爸，让人家等侬，真是老没有礼貌嗰！”

　　几乎一样个故事辣我屋里向也发生过。当年儿子辣读高中，大年夜吃年夜饭个辰光。菜侪辣台子浪摆好了，满满一桌，酒杯里也倒好了葡萄酒，但是儿子躲辣书房里就是不出来。等到后来，热菜侪变成了“冷盆”。我邪气生气，冲进书房，发现儿子正辣ipad浪向白相游戏。精彩个游戏画面和紧张个游戏气氛一下子就拿我吸引过去，我忘记教训儿子，相反还向伊讨教白相游戏个技巧。后来，儿子辣辣妻子个催促下离开了，我反而白相得欲罢勿能。最后辣妻子再三催促下，我一步三回头走向餐桌。妻子喝道：“爷儿子两个人哪能一个腔调？”我只好边陪笑边回答：“勿奇怪，基因一样嗰。”

　　“勿靠谱的代笔”也是一个有趣故事：儿子辣做数学题，愁眉苦脸，爸爸决定代替儿子写作业。啥人晓得第二天老师检查作业，发现作业错得离谱，决定寻家长谈谈。爸爸问：“我儿子又犯啥错啦？”儿子辩解：“作业勿是我做嗰，犯错搭我勿搭界。”老师怒火中烧，拿爸爸揿辣台子浪，用教鞭抽屁股，爸爸眼泪水答答滴，保证再也勿帮儿子代笔了。

　　迭个故事辣阿拉屋里也发生过。当时儿子读小学三年级，参加数学兴趣班，题目邪气难，儿子不会做。我虽然呒没研究过伊拉个教材，但是数学基础勿薄，想了一想，就用一元二次方程解出了答案。为了勿露马脚，我排出算式，叫儿子抄一遍交上去，自以为天衣无缝。呒没想到，老师一看就发现问题，打电话教育我，我只好服服帖帖听训。是呀，三年级小朋友哪能会解方程呢？真是天方夜谭！

　　埃·奥·卜劳恩生活辣上世纪初，居然凭借天才个想象力，画出了七十年后发生了中国个故事，我佩服得五体投地。我也辣朋友圈里建议其他朋友不妨读一眼小人书，搿也是一种帮阿拉寻回童年找回快乐个勿错选择。