我外婆是一个心灵手巧个裁缝，上个世纪七十年代伊从里弄生产组退休以后，就开始想自己做点事情。外婆一共有六个小囡，辣伊拉小个辰光，外婆就为伊拉做了所有从里到外个衣裳，埃歇辰光，白天外婆辣生产组踏缝纫机，夜里还要为六个小囡做衣裳、布鞋、书包，一年四季侪呒没辰光休息，老勿容易嗰。后来，伊又开始带我，也就是从埃歇辰光开始外婆想自家独立做裁缝了，因为伊还是有点基础嗰。

　　老早我问过外婆是跟啥人学做裁缝嗰？讲出来侬可能勿相信，外婆讲伊是自学嗰，而且居然是先答应了人家，讲好一个礼拜做好一件丝棉棉袄！外婆讲虽然伊答应人家了，但是心里还是蛮哒哒动嗰，当天夜里伊呒没困觉，连夜拿一件自家个棉袄一点点拆开来研究，研究前后片、领头、袖子管是哪能缝起来嗰，盘扣呢就拆了一粒，伊想因为第一趟做，就做最简单个样式。就搿能，外婆上半夜拆棉袄，研究好以后下半夜再一针针缝起来。迭一夜对外婆来讲是老有意义嗰，天亮个辰光伊居然真个拿棉袄完整缝好了，伊心里也有数了。后来伊准时做好棉袄，人家老满意嗰，外婆也有信心了。因为伊上手第一单做个就是复杂个丝棉棉袄，接下来做两用衫、衬衫、裙子对伊来讲是做减法，就比较得心应手了。

　　我呢，小辰光最欢喜看外婆做棉袄，因为从裁剪到缝针到往里向塞丝棉，还有做一只只盘扣，有交关多个看头。尤其是做盘扣，就算最简单个直盘扣，也要先拿布料折叠缝成细条，做成袢条，一面缝一面要拿棉花做内衬缝进去，迭能袢条就比较挺括了，再用小镊子夹牢袢条个一头，拿伊编成球状个扣坨固定好，另外一头就可以缝到衣裳浪向了。假使是琵琶扣、蝴蝶扣之类个花扣，做起来还要复杂。想靠纯手工拿盘扣做得大小、花式侪一样绝对勿是一桩容易个事体，每一趟看，我总归还是觉得老扎劲嗰，从平面布料变成一只只立体个蝴蝶和琵琶，真个是充满想象个空间。

　　虽然外婆连帮手也呒没请过，所有事体侪是伊一个人做嗰，但是伊总是做得井井有条，忙而勿乱。因为外婆做衣裳仔细，又会按照杂志浪向个样子驳样，所以后来请外婆来做衣裳个人越来越多，尤其是年纪轻个小姑娘。每天我放学回到屋里，经常会看到刚刚下班个小姑娘拿了时装杂志来订做衣裳，有人自家带布料，有人连布料也托外婆去买。埃歇辰光个时装杂志相当实用，里向不但有详细个裁剪图样，尺寸也标得邪气细致，精确到毫米。读初中个辰光，我还专门选了服装裁剪兴趣小组，有一段辰光蛮欢喜嗰，可惜我从来也呒没真正拿图样画出来并做成一件衣裳，否则做个辰光肯定好向外婆请教请教，迭个真是蛮遗憾嗰。

　　外婆邪气讲信用，假使生意多，忙勿过来，伊一定会告诉人家，要么等，要么到其他地方去做，从来也勿会勿管三七廿一先接下来再讲。我印象当中外婆做衣裳最重要个工具就是一大块木板、三角尺、软尺、一盒划粉、一只顶针箍、一盒针线、一只镊子、一只老重个铁熨斗、一台蝴蝶牌缝纫机，外婆就靠着搿眼工具，辣外公过世后一个人拿六个呒没成年个小囡养大成人。因为我爷娘工作忙，我也一直辣外婆身边长大，直到十八岁离开上海去读大学。我从小到大个衣裳几乎侪是外婆做嗰，就连我小囡生出来，外婆专门来看我，带来个还是伊亲手做个一套小衣裳和一件伊手工钩个花式小毛衣，我一直拿伊拉珍藏辣抽屉里，每趟整理衣橱个辰光侪会摸一摸，好像通过伊拉我又和外婆重逢了。