前几天逛超市，忽然看到有瓶装“黑猪猪油”卖，勿由想到老早子姆妈用猪油做菜个事体。

　　当时我刚刚读初中，正好碰着三年困难时期，市面浪可以买到个食品基本浪侪要凭票定量供应。阿拉搿种“半大小子”消化快容易饿，上到第四节课辰光，肚皮里就开始叽里咕噜响了。记得最清爽个是，鸳蝴派文人陆澹安先生，曾经送给我阿爸一罐猪油，姆妈高价买来两条鲫鱼，用红烧鲫鱼汤拌饭，加一调羹猪油，搿种味道，老实讲，到现在仍旧忘记勿脱。

　　埃息辰光，猪油是个宝，白糖猪油汤团、白糖猪油馒头、猪油咸菜拌面、猪油菜饭……一上桌，立刻狼吞虎咽，舌头差点烫出泡还顾勿得了。过春节，阿爸单位里个领导，著名编辑出版家李俊民等人，总要来跟单位里个同事拜年，记得姆妈侪是用鸡蛋液煎猪油年糕招待客人。

　　除脱猪油，猪油渣也是上等食材。每当姆妈用肥猪肉熬猪油，我总要立辣边浪向，油渣刚一出锅，就马上伸手捞几粒，放辣嘴巴里乱嚼，感觉味道特别香脆。猪油渣炒白菜粉条是我青少年时期最欢喜吃个美味。

　　再后来被抽调到大庆油田工作。采油队里有一个姓吴个技术员，北京石油学院毕业嗰。伊身高体长，但邪气瘦。大庆周边是一个草原，油田四周侪是盐碱地，打出个深井水侪是暗绿色嗰，汏浴辰光，不用肥皂，不管侬哪能冲洗，总是滑踏踏嗰。可能因为水里向碱性重，肚肠里个油水刮得清清爽爽，搿位老吴同志每天吃中饭前，用调羹从广口瓶里挖两小勺猪油，直接吃到嘴巴里，再去吃高粱米饭，看得我目瞪口呆。

　　现在市场浪物资供应充足，可以吃个物事花样百出，大家怕高血压高血脂，吃个食品侪讲究少盐少油，猪油已经从厨房间里消失很多年了，但是猪油辣我青少年时代，带来个舌头和肠胃浪个享受，是我一辈子忘记勿脱嗰。