夏天热煞，两隔壁人家子女闷在空调房白相电子游戏，渴了喝瓶装水，饿了叫外卖，乃末想起从前阿拉“小小班”闹猛辰光。

　　老底子呒没空调电风扇，同班读书住得近侪辣“小小班”活动，一道做老师布置个暑假作业。埃歇辰光，我是班级里个小干部，“小小班”就设辣我屋里，同学有小芳、德功、时顺利、罗红兵，连我在内一共5个。小芳头子活络，德功精怪，时顺利聪明，罗红兵是捣蛋鬼，所以第一趟“开班”我就叫伊拉摊开假期作业记录，有漏脱呒没记嗰当场补好。

　　埃歇辰光看勿到电子游戏机，屋里有只半导体收音机就勿错了。作业差不多做好了才可以白相，白相个内容包括象棋、陆战棋、飞行棋、打牌、掼结子等。有关部队里个军、师、旅、团、营、连、排等名称就是辣“陆战棋”里晓得嗰。至于“掼结子”，就是用一只充当“结子”个小沙包搭仔十几只旧麻将牌组成。白相个辰光拿“结子”往上抛，趁伊还呒没落下来，用单手或双手拿旁边个麻将牌搭成一定花式。

　　小芳手快，有辰光罗红兵同伊捣乱，拿麻将牌挪位置，小芳一巴掌拍辣伊头浪向，也勿影响翻牌速度。时顺利手巧，有一次结子里个沙子漏出来了，伊从我外婆搿搭要了一把籼米和针线布，当场就做了一只擦括辣新个结子。伊还会用啤酒瓶盖贴“腊光纸”做“五子棋”。后来伊辣服装公司“顺风顺水”大概就是得益于小辰光练个“童子功”。

　　德功讲得出交关香烟壳子名堂，比如“大前门”像“天安门”；“海鸥牌”三道浪传奇。伊还拿来贴有邮票个旧信封，用我屋里个面盆和水，让阿拉帮伊拿邮票剪下来浸水剥开，原来搿种白相叫“集邮票”。

　　有辰光小芳也会拿几张好看个龌龊糖纸头汏清爽，然后摊开辣手心里，再松手让糖纸头自动卷起来，据说卷得拢就说明糖纸头质量好。

　　还有个练脑子个游戏叫“算廿四点”，就是随机抽出4张扑克牌，用牌浪个数字进行加减乘除运算，目标是得出结果24。啥人快、准、狠取得第一名，大家侪会拍手庆祝。后来我拿搿种游戏教给弟弟妹妹，发现伊拉个运算能力侪提高了。

　　除脱辣房间里白相，“小小班”有辰光也会野到外头，现在个曲阳新村辣当年还是农村，到处侪是菜田、鱼塘、草地，是吸引阿拉去白相个好地方。抓蜻蜓、捉蝈氓、黏知了，暑假不知不觉就过去了，开学了四年级变成五年级。长大了才晓得“蝈氓”学名叫“螽斯”，“知了”叫“蝉”；还有一种像太阳花个野菜，郊区蹲过个罗红兵讲是喂猪猡个“猪蒜头”，小芳讲人也可以吃个叫“马齿苋”。阿拉采了一把带回屋里，外婆讲搿种野菜晒干可以做包子。到了寒假里，有办“小小班”，小芳伊拉侪尝到了我外婆做个马齿苋包子，果然好吃。

　　成年以后阿拉几个老同学侪是收入稳定，温饱有余，关键是身心健康。笑看春花秋月，闲听风吟鸟鸣。小芳欢喜热闹，经常去公园跳广场舞。德功仍旧热衷集邮。罗红兵帮儿子带小毛头。阿拉“活到老学到老”，有微信群还会淘宝购物。前两天，几个人还约好一道去奉贤博物馆看雍正故宫文物。今年搿个夏天也是过得有滋有味啊。