再过一天，国庆长假就要结束了，我勿由想起小辰光国庆节看烟花个事体。记得当年国庆放假只有两天，但是相对每周休息一天来讲，已经算“长假”了，所以过节之前，大家侪会做好计划。平常呒没辰光做个事体，放长假就可以安排一下，平常呒没辰光走动个亲眷也可以走动一番。勿过，对阿拉小朋友来讲，到人民广场看烟花就是最开心个事体了。

　　辣我个记忆里，国庆节第一天，阿拉一家门侪勿会困懒觉，老清老早就一道出门，去外婆屋里做人客。外婆住辣南市北施家弄，隔壁就是陆佰鸿老宅。关于陆佰鸿，小辰光听过一些故事，据说早年上海南市开通个第一条有轨电车，就是伊出资修建嗰，当时每辆电车车头浪向侪安装“绿、白、红”三种颜色电灯，就是伊姓名个谐音（陆、佰、鸿）。记得当时阿拉几个小人，特别喜欢到陆佰鸿老宅里向白相捉迷藏。因为搿幢房子大，房间多，勿管是躲还是找，侪邪气有劲。

　　中浪向回外婆屋里吃过中饭，阿拉一家门就从外婆屋里出来，从中华路走到城隍庙白相。印象里辣前头弄堂口，王家嘴街，有一家南货店，柜台浪有几排椭圆形个透明玻璃瓶，里向装满各种各样小零食，譬如盐津枣、咸橄榄、弹子糖等等，五颜六色。花几分洋钿，就可以让营业员用一只铁皮勺从玻璃瓶里取一些零食，用牛皮纸包成一个三角包。到了城隍庙，穿过九曲桥，就有一排小商铺，弟弟喜欢乐器，有一年爸爸拨伊买了一根笛子，我欢喜看小人书，总能收获一两本。城隍庙个小吃也是保留节目，我印象比较深个是鸡鸭血汤，味道邪气好。

　　下半天三点多钟，阿拉一家门就沿淮海东路朝人民广场走，必须辣四点钟之前走进人民广场。为了控制广场里个人数，避免发生拥挤踩踏事故，四点钟以后进人民广场个路口就会封锁，只出勿进。即便如此，人民广场里向仍旧人山人海。进到广场里，寻一块空地，铺开几张报纸，阿拉一家门就席地而坐，吃零食，喝饮料。周围其他人家大多数也是搿能嗰。大人坐辣一道聊天，阿拉搿点小朋友又开始活跃起来。附近几个小朋友勿管认勿认得，侪凑到一道，辣附近白相一眼小游戏，譬如打弹子、跳房子、打羽毛球之类。大家奔跑，跳跃，开心得勿得了。勿过勿敢走远，怕走散脱寻勿回来。

　　天色一点点暗下来，广场周围有几只探照灯亮起来，光柱扫过夜空，阿拉搿点小朋友侪自觉回到家人身边。突然，“乒”的一声闷响，一颗火星飞上天空，猛地爆发开来，炸出一大片彩色花火。“这是万紫千红，这是百鸟争鸣，这是浪花朵朵……”广场边个喇叭里响起广播员的声音，广场浪向顿时变成一片欢乐个海洋。

　　看完放烟花，广场上人慢慢退出，阿拉一家门又冲入人贴人个淮海路看灯。弟弟吵着“看不到。看不到”，老爸让伊骑到肩胛浪，弟弟一下子成了“姚明”，开心煞了。一直慢慢荡到陕西南路，再乘41路回家。回到屋里向，已经夜里十一点多，国庆节一天，就搿能开开心心结束了。

　　现在回想起来，埃歇辰光过国庆节介开心，除脱平常辰光娱乐活动少，大家袋袋里钞票少，文化娱乐呒没市场化也是重要因素。现在碰着国庆长假，有人提前买飞机票、火车票，准备出远门旅游；有人孵辣屋里困懒觉、吃馆子、上网白相游戏；也有人买几本想看个书，利用长假享受阅读个乐趣。总之，各人有各人个过法。阿拉几个老朋友通过微信朋友圈约好，一道看国庆大阅兵。