总算出太阳了，滴滴答答落仔一礼拜雨，房间里随便啥物事摸上去，侪有点潮叽叽，黏滋滋，像煞可以掐得出水来。齐巧辣电视里看到一条新闻，蛮噱：讲一家人家，屋里墙壁浪，沿牢踢脚线，居然长出一朵朵白蘑菇来。勿晓得迭种蘑菇好吃口伐，不过，迭两日，树浪向落下来个白果倒是可以吃了。

　　小区小花园里，地浪水渍还呒没干透，轻轻交走，仔细寻落脚地方。夜里向拨暴雨冲下来个白果，又拨夜归或者是早起个人，踏碎辣泥水里，看见仔心里觉着蛮肉麻——一直老欢喜白果，名字也欢喜，样子也欢喜，吃口也欢喜……就像年轻辰光欢喜一个人，欢喜就是欢喜了，呒没道理。是呀，道理，其实侪是长大了再懂嗰，是规矩，也是马后炮。

　　白果是好物事，中医讲起来，敛肺定喘，止带缩尿。讲起缩尿，还有一只古代人个段子，讲考生进考场，答卷总要争分夺秒，更何况还有一个皇帝亲自面试个环节。所以，为了防止要紧要慢辰光内急，晓得门槛个考生会提早吃一把白果下去。

　　吃多少？有规矩嗰。所以，规矩是要嗰，否则就呒没方圆了。比方讲，白果好吃，但是，生嗰勿好吃，有毒；熟嗰也勿好多吃，据说，一记头吃上千颗白果，人要翘辫子。只不过，啥人会得拿介许多白果一记头吃下去啊！

　　有一个老伯伯，教过我一个方法：拿一只牛皮纸信封，装十几粒白果进去，微波炉开高火，转半分钟左右就好了。其实，只要听到里向白果爆裂声，从稀稀拉拉，到越来越急，就差勿多了。拿出来稍许冷一冷，剥一只，吃一只，灰绿颜色，像软玉一样个白果，味道老好。

　　老伯伯辣春天里驾鹤西去。而伊屋里门口种个两棵树浪，白果应该又长足长满了口伐？白果，每年差勿多，心情，每年侪会有点勿一样。