辣我小辰光，浦东到处是绿油油个农田，到处有纵横交错个小河浜。阿拉小朋友常常一道去“拷浜头”。拷浜头卖了鱼得了钱，交给姆妈，自家还有五分、一角个“奖赏”呢。

　　村里个河浜称为“宅河”，是“家浜头”，会有鱼苗放进去。野田里个河浜叫“野浜头”。野浜头里不放鱼苗，但碰着发大水，或者落暴雨，家浜头里个鱼会逃到野浜头里。星期日或者暑假里，我就带着鱼篓，用旧火油箱改制个拷斗（水桶），拦鱼个“张筛”以及捣堰（筑坝）用个铁搭，出去寻浜头，小河浜就一家头拷，大一点嗰就叫小朋友一道拷。

　　有一天，我和好朋友徐国祥，来到俞家宅后底头称为“狭缝里”个田野里向，埃个地方有东西两条南北向个河浜，大家侪叫伊拉“狭缝”。“西狭缝”里水草茂盛，老堰桩脚浪长满杂草，看来长远呒没人来拷了。阿拉两家头辣靠浜稍近四五米个河段，筑了一个堰，然后跳入河里向外拷水。随着一阵“哗啦——哗啦——”个拷水声，堰里水位慢慢下降……勿多辰光，就看到有勿少鱼辣辣水里窜东窜西，经常有鱼辣脚浪向乱撞。眼看胜利在望，啥人晓得之前堆得半人多高个堰，抵挡不住堰外个水压，先是淅沥沥漏起水来，转眼间就轰然倒塌。唉，忙了半天，最后一场空，阿拉两家头心里侪邪气难过。

　　不过，多数拷浜头是成功嗰，有辰光捉到十斤八斤鲫鱼、黑鱼、甲鱼，外加螺蛳、河蚌、蛏子，还有老柴虾咾啥。阿拉拿拷浜头得到个鱼虾拿到南码头、周家渡，或者陆家嘴马路市场去卖，每趟少嗰能分到两三元，多个辰光有五六元。

　　每当我拿卖鱼铜钿交拨姆妈，心里感觉到邪气自豪：我也能赚钞票了。每趟出门去拷浜头，姆妈侪要叮嘱几句：“侬要当心点喔，拷勿着嘛早点回来！”每趟拿卖剩个小鱼、小虾、黄鳝带回家，姆妈总是讲：“唉，撩鱼摸蟹败家精，油盐酱醋用干净，亻那两只小鬼头侪是败家精！”虽然嘴巴浪搿能讲，姆妈汏鱼烧虾还是蛮起劲嗰。勿管哪能讲，屋里又有一顿荤菜吃了呀。

　　随着浦东大开发，绿油油个农田变成整齐个街道和楼房，小河浜也消失了，“拷浜头”成了我美好个记忆。