碰到陌生人向我问路，我侪是愿意相帮嗰。有几桩事体印象蛮深：十多年前，一个军装先生问我鲁迅故居哪能走。我以立个位置搭伊讲山阴路大陆新村鲁迅故居方向。晓得搿位先生是鲁迅的“粉丝”而且时间宽松，我就建议伊顺路参观四川北路上内山书店旧址搭仔附近公园里鲁迅雕像和纪念馆。唉个辰光旅游资料不多，也呒没手机百度，听我搿能介绍，迭位先生相当满意，勿但连声感谢，走出几步以后还向我举手致敬，反倒让我觉得过意勿去。

　　还有一趟辣地铁人民广场站也是一个小伙子向我问路。伊开口一句“老阿姨”差点让我厥倒，周围个眼光侪朝我“刷”过来。跟搿歇勿一样，“老阿姨”迭个称呼辣以前老野豁豁嗰。搿个小伙子明显勿晓得上海闲话里个讲究，只是按照字面意思理解。我认真回答以后，又诚恳对伊讲：“侬要么称我‘大姐’，要么叫我‘阿姨’，搿个‘老’字就勿要带了，辣上海，‘老阿姨’实在不好听！”旁边有人听到我个讲法，侪忍不住笑出来，搿个小伙子也是“嗯嗯啊啊”答应，就是勿晓得伊听进去了口伐。不管伊了，我是好心做好事。

　　前两日上海旅游节，我路过重庆路延安路高架，看到一男一女两个外国中老年人辣辣东张西望，好像是辣寻路。看到我走近，那位女士对我连声说道：“缪岁姆，缪岁姆。”我一听，缪岁姆？应该是museum，博物馆，伊拉大概是要去上海博物馆。距离勿远，我示意伊拉跟我走。或许是看出我原来并勿是去迭个方向，两个人又“叽里咕噜”讲了一通，我大概明白伊拉个意思是勿需要我耽误辰光带路。我安慰伊拉：“I have enough time（我时间足够）.”

　　又走了一段，那位男士又对我说话了。我忽然想起手机里有“腾讯翻译君”软件，就掏出来让伊拉讲。哎，这玩意还挺好用的！屏幕上先是显示出英文，然后就翻译出中文。噢，原来伊拉两家头只是出来散步，我可以离开了。好吧，那就随意！看着两人欢欢喜喜离开个背影，我心里也是蛮开心嗰。

　　给人家一个笑脸，帮别人指路只是一件小事，既能助人又让自己心里很干净，实在是一举多得啊！