走辣古镇七宝，五花八门个小吃目不暇接，勿过我对海棠糕印象顶深。伊扁圆个头，小巧玲珑。我小辰光时常跑去店堂买来吃，八分洋钿一只。 

　　立辣拿柏油桶改制个煤饼炉前看师傅做海棠糕，蛮有趣个。伊手操一对“母子”铁铸平底烙锅，母锅内腔间隔镂空，中间一洞，四周呈梅花型排列，只只眼子大小均等，滴溜滚圆。伊先拿母爿放火浪烤，每只洞眼舀进三分之一面浆，然后添加豆沙当芯子，又配一小块糖拌猪油，再舀面浆齐口灌满，最后取子爿同先前母爿对称合扑盖牢，翻转身继续烤。一歇工夫，海棠糕熟哉，面子薄薄，金黄灿灿，像焦勿焦又香又脆。壳子松软，咬辣嘴里油而勿滑，甜而勿粘，味【mi】道邪好。师傅见我狼吞虎咽，笑眯眯讲：好吃来敲耳光也勿肯放是 ？老板娘一旁扎劲介绍：三国辰光，孙权牵马歇脚七宝塘桥河浜头个一棵树下头，吃仔搿种糕赞勿绝口。问店家迭个糕叫啥，店家讲：糖糕。孙权：勿妥勿妥。用糖做糕，“糖糕”者遍及天南地北也，像搿般好吃吊人胃口个物事，应该有个好听名字。讲好若有所思，抬眼望，勿远处正逢海棠开花，一朵朵白洁玉澈，嫩粉婉红，煞是漂亮，便脱口道：唤作“海棠糕”如何？伲店家眉开眼笑，从此，搿个名字传遍东吴。 

　　另一家做个海棠糕味道同样勿错。老板勿服气讲，孙权当初阿里品尝过海棠糕？搿个名称由来，出自本店祖浪，因为伊拉十七八代老祖宗个阿奶个阿奶人长得娇小清秀，名字叫海棠，“海棠糕”模样精巧，所以就拿伊名字套用哉。 

　　生意场浪竞争激烈，生意人挖空心思想扬名招牌勿足为怪。至于传说是虚是实，我呒没考证，但搿个有啥关系呢？反正从我记事起，大家一直流传叫伊“海棠糕”，人云亦云，叫惯哉，顺口！