上个世纪80年代之前，上海人屋里向有私人电话个勿多，大多数老百姓靠公用电话搭仔传呼电话互相联系。差勿多每条弄堂口总归有一间小房间，放两只电话，伊种一墨色黑个老式电话个话筒横搁垃拉电话机浪向，拨号头要用手指头塞到拨号盘个阿拉伯字圆洞洞里，沿牢顺时针方向转到底，拔出手指头，等拨号个圆盘转回到头，再拨下头一只号头，同时电话机会发出拨号个声音，伊歇辰光上海个电话号头六位数，搿末就要拨六记，拨号盘转六趟，算是完成了拨号程序。电话间一般有两个老阿姨或者老爷叔喊电话，两只带拨号盘个电话机，一只是可以打进来，也可以打出去个，另一只电话机是呒没拨号盘个，只好打进来，勿好打出去个。迭能基本保证了老百姓公用电话、传呼电话个通讯需要。一只公用电话亭子要为对口个所有人家负责传呼，还有一种是兼营个，比方讲烟纸店。多数烟纸店个柜台浪会放只黑颜色个电话机，勿过只有一只，可以打进也可以打出个电话机。负责传呼电话个阿姨（爷叔）个个邪气能干，对于电话所辖范围个所有人家个居民了如指掌。连电话对方是啥人侪煞煞清。跑到门口哇啦哇啦一叫：“43号亭子间个王阿姨， 闵行个四爷叔电话来了，快点下来！”“噢，晓得了，谢谢侬，马上来了！”假使拨传呼个人家呒没人，阿姨会拿对方个事体简单个记下来，记垃拉电话亭子个黑板浪，或者是写垃传呼纸头浪，夜快头主人下班辰光就可以从传呼阿姨搿搭晓得啥人来电话了，按照回电号头再打过去。讲句老实闲话，伊歇辰光呒没啥“隐私”个。介绍朋友、谈恋爱、借钞票、轧头寸、调房子、寻工作、闹离婚……几乎所有个家庭大小事体瞒勿脱管传呼电话个阿姨爷叔，阿姨爷叔还是拎得清个，勿会东家长西家短个。比方讲等垃传呼电话边浪向小青年，电话一响，一个箭步上去抢话筒，一听勿是自家朋友个电话，乃末垂头丧气；假使正好是朋友打来个电话，葛末兴高采烈。苗头一轧就晓得伊垃拉谈朋友。传呼电话服务个阿姨爷叔个鞋子特别“伤”，经常为仔叫一只电话，来回跑几百米勿稀奇。喊起电话来还要拔直子喉咙叫，实在是吃力煞脱了。伊歇辰光个传呼费就是3分洋钿，而打出一只公用电话也勿过4分洋钿。难板碰着有种勿二勿三个人来打电话，一听勿对，传呼阿姨爷叔赛过保安联防队，轧出苗头，随后通知居民委员会、派出所，提供信息，起到保护社会治安个作用。 

　　30多年过去了，传呼电话已经是怀旧故事，迭批当年做过传呼电话个阿姨爷叔，现在至少已经是七老八十个老头老太，想起伊歇辰光伊拉做过个大量方便老百姓个事体，到现在还邪气牵记伊拉，还呒没忘记脱伊拉。