阿拉小辰光，拨拉大人吃生活是老正常个事体，只不过多点少点而已。垃拉搿搭我可以老得意个讲：我拨拉爷娘“吃生活”，跟弄堂里其他小人比，肯定是算少个，弄堂里个“皮小鬼【ju】”拨大人打，真叫：大打三六九，小打天天有。每到夜快点，总归好听到 打伊拉打得“哇、哇”穷哭个声音。我常常听到阿拉姆妈垃拉厨房炒菜个辰光讲：侬听，3号里个华华又拨伊拉姆妈“吃生活”了。

　　我拨拉姆妈吃个两次“生活”，印象蛮深个。一趟是：一顶海富绒帽子买来一天，就拨我落脱了；还有一趟是我拿同学屋里向个一块玻璃敲【kao】坏脱了。碰着搿种事体，我也晓得搿顿“生活”是逃勿脱个。搿天回去，阿拉姆妈板垃拉个面孔，一时还勿打我，还让我吃饭，侬想，我啥地方还有心想吃饭，心里反而想，早点打打脱算了。夜饭吃好，碗筷收捉好，只看到阿拉姆妈拿了一把尺：“过来。”我只好老老实实过去，“手伸出来。”呒没办法，抖索索拿手伸过去，“叭、叭、叭。”开门见山先三记，呒没还价个。我硬劲屏牢，眼泪水垃拉眼眶里转，就是勿落下来，后来，姆妈训一句，打一记，我也记勿得打了多少记？小手心已经通通红了，最后实在熬不牢了，“哇……”嚎啕大哭起来了。夜里向，睏拉被头里人还拉抽，这顿“生活”吃了蛮结棍个。不过，想想也蛮奇怪个，拨姆妈打过勿会记仇个，一觉醒来就忘记脱了，还是“姆妈、姆妈”亲热个叫个勿停。