我是个老年退休教师，回想起自家小辰光垃拉小学里读书个一些事体，记忆犹新。阿拉学堂名字叫“树基小学”，就垃拉天妃宫桥（今河南路桥）北堍，现在属于闸北区。学堂南面过苏州河就是黄浦区了。而学堂东面，马路对过搿爿雷允上中药店（现因拓宽马路已拆脱）则是虹口区。可以讲，阿拉学堂现在讲起来是一校跨三区，搿个辣上海是勿大有个。

　　树基小学解放后改名叫河南北路小学，当时学堂个三角形校徽上面画辣一棵老大个树桩，意思是讲小学读书是打基础，基础打牢靠，以后继续努力就能成才。一所小学个校名取得介通俗、贴切、高雅，寓意交关深刻，让人一辈子也忘记勿脱。阿拉学堂地方并不大，北面有一块比两只篮球场大一眼眼个操场，四周为教室，二层楼房，围成一圈，教室外面是回廊。学堂中间部分，原来是天妃宫大殿，据资料介绍，建于清朝，面积330平方米，拨学堂当作大礼堂搭仔室内运动场来使用个。这座歇山顶飞檐大殿后来（大约在文革前后）因学堂动迁也被整体拆脱，迁到市郊松江方塔公园重建，是上海勿大有个，邪气珍贵个古建筑。

　　特别对学堂大礼堂要讲一讲，就是不论解放前，还是解放后，阿拉学堂有迭能个传统，每个礼拜六下半日，全校师生侪要集中辣大礼堂里向看戏，由各个班级个同学轮流演戏，自编自导自演，邪气有趣。节目大多涉及一些童话故事搭仔同学中个好人好事（解放前称“少年美谈”），演出形式以话剧、活报剧为主，有辰光也有独唱、重唱搭仔舞蹈表演咾啥。记得刚解放搿个辰光，多演出一些蒋介石吃败仗个戏，小演员演个蒋介石身穿旧军装，脚蹬高统套鞋（代替高统皮靴），面孔浪向还要贴一小块黑色烂膏药，来表示老蒋吃了败仗个一副窘相。学生演戏，勿但丰富了学生子个课余生活，也培养了伊拉个编、导、演几方面个才能。总之，半个多世纪以前，小学里向个一些事体，我真是一生一世也忘记勿脱。