今年天浪向个水好像特别多。华中、华南个交关地方发生了洪灾。就是辣欧洲，德国、奥地利、捷克、斯洛伐克也发了大水。从电视新闻里可以看到搿些地方水漫金水、一片汪洋。广场变成了河浜，街道变成了水道，汽艇变成了水上巴士来抢救灾民。水火无情。

　　卅年前个辰光，上海也年年要发几趟大水。上海人拿城市积水叫做涨大水。市中心里，靠近外滩个几条马路常常会积水。原来卢湾区个重庆南路、建国东路、自忠路、淡水路也是重灾区域。只要有台风暴雨来过，迭点地方侪会涨起尺把高个大水。不但天浪个雨水积了起来，连街沿边浪个阴沟洞里也倒灌上来不得了个黑水污泥。马路浪小菜场辣大水里做生意。汽车、电车辣大水里慢吞吞开过，免得积水卷起浪头冲进路边个人家告商店。涨大水勿会影响上海人个上班和上学。大家涉水上路。用上海闲话来讲，搿就叫做爬大水。以一个爬字来形容辣没膝头深个水里一脚高一脚低个行走，老老生动个，搿辰光穿套鞋、穿中、高统套鞋侪不来三哉。穿一双木拖板最解决问题。赤了脚去爬大水是危险个。因为看勿清爽个积水里会有碎石、铁屑甚至碎玻璃片要划伤扎破侬个脚底。只有涨进大弄堂、小弄堂里个大水引得一班小小囡去白相大战。伊拉年纪小，还呒没一点清头。

　　上海滩发大水、涨大水，当时个市、区各级领导侪会去爬大水。伊拉要到现场去指挥排水引水，要到老百姓个屋里向去解忧慰问。我记得时任上海市领导个市委书记江泽民、市长朱镕基都去过大水发得厉害个路段视察过。伊个辰光上海媒体个三报两台侪做过搿样个一线报道：“市里领导也爬大水了。”

　　城市积水一是由于地面个沉降，一是由于地下排水系统不够健全。还因为大城市辣发展中填没了交交关关个城内大小河浜。老早老早个洋泾浜变成了今朝个延安路。后首来肇嘉浜、陆家浜也填成了大马路。所以，辣城镇化建设中注意保留河叉水道也是必须个。上海搿些年个拓展中就关切到了迭一层。徐汇、长宁、闵行个新区里就留存了交关大河小浜了。对于老城区个改造，还加强了地下排水个功能。一年一年过去得老快。上海人已经快要忘记脱老里八早大水、涨大水、爬大水个故事了。希望迭样个忘记性越多越好。呵呵。