十几年前，中国人出国开销还用勿上信用卡。大家带足铜钿银子。中国人因此就拨外国瘪三盯牢，一有机会伊拉就会来抢侬一票。法国世界杯个辰光，我和几个外地去个记者合租了巴黎台勒维勒区域里个一套三室一厅个公寓。勿算群居，每人一间。台勒维勒，法语，凤凰城个意思。勿是富人区，黑人、白人、阿拉伯人、亚洲人都有，治安相当推扳。“半夜之后勿要上街！”房东关照了又关照。不过，大白天也勿见得保险。一个中国老记早浪向就拨几个小混混用刀逼进了一条小弄堂。被抢走了一万美金。听到消息，阿拉几个还呒没警惕起来。终于，搭我同住个一位西安老记辣回公寓个辰光稀里糊涂进了电梯，就拨两个年轻人一左一右夹牢，刀子顶牢前胸后背。只好举手投降。伊被抢走了一台平板电脑、六千美金。大家后来帮伊去捉强盗，人影子也呒没寻到一个。

　　每天球赛结束，我要又写又画。房东呒没传真机，我必须要走过几条横马路到一家四星宾馆去发传真。搿个辰光常常就是半夜三更，巴黎时间个凌晨一、两点钟。我一个人去，一个人回。为防意外，我上披运动衫，下着灯笼裤，还穿一双老北京个圆口布鞋。哪能看，也是一个有点拳脚功夫个中国高人。一天夜里果真就撞见打劫个了。是四五个小鬼头，也就十七八岁。领头个一个岁数大点，身高马大，叽哩呱啦勿晓得讲点啥。伊拉围上来，打个手势就是要我识相点交出钞票来。我急智常常来。我伸手一扬，一叠已经发好个文稿画稿飞到天上。趁伊拉一呆一怔，纵身跳出圈子，先展开双臂，金鸡独立，摆出一个大鹏展翅个造型。马上又收拢双手，张开五指上下摇摆，算是一招螳螂捕食个功架。我是做过三年体育老师个，会一点摔跤擒拿格斗，水平搭浆。但是摆到巴黎黑孛隆冬马路上去，真可以叫外国人吃勿煞。几个小赤佬怯胆了，互相使个眼色一哄而散。我人勿追伊拉，但声音要追上伊拉。拉直嗓门骂了一通上海闲话山门：“要吃生活？想寻死睏棺材？册那！”一通声响早就引出了一群夜店里个吃客。看到如此动静，有拍手个、有竖大拇指个，一片喝彩。我俯身收起散落个稿纸，拱手谢过，扬长而去。尽管是三脚猫个中国功夫，却也摆平了凤凰城。此后半个月里，再也呒没小混混来惊扰我了。哈哈。开心。