鲁迅先生勒浪1926年写过一篇文章，叫做《藤野先生》，教科书里还收集过迭篇名文。

　　文章回忆了鲁迅1904年秋天到日本仙台医专留学辰光，碰到一位好老师，姓藤野，名严，排行老九，所以又叫藤野九郎。鲁迅勒迭篇散文里，称赞藤野对自己从生活到学习侪有照顾。原来鲁迅住个地方是二楼，楼下侪是从外地赶来探监个犯人家属，还包办犯人饭食。鲁迅老勿适意，后来是藤野先生帮忙，搬到另一个地方住。藤野先生还用红笔，帮鲁迅一笔一划、仔仔细细修改讲义和笔记。

　　据说，现在日本东北医科大学个教室里还有一张藤野先生个照片，30岁出头样子，面孔黑瘦，留两撇八字胡须，着西装，戴领结，一副黑边眼镜。

　　到第二学年结束，鲁迅去看藤野先生，告诉先生不想学医，而且要离开仙台。藤野个脸色有些难看，想讲两句闲话，但呒没讲出来。伊送拨鲁迅一张照片，后面写了两个字：“惜别”。鲁迅交关看重迭张照片，回国后，一直挂勒房间里。

　　格末，藤野先生后来做啥去了呢？

　　1915年仙台市决定成立东北医科大学，仙台医专变成东北大学医学部。校方借口藤野学历勿够，拿伊从教授降为讲师，还逼伊辞职。藤野因为生活所迫，只好到东京三井公司一家慈善医院做全科医生，1919年回故乡开诊所。

　　鲁迅先生自离开仙台后，呒没搭藤野先生见过面。后来，鲁迅一直打听藤野先生到啥地方去了，包括向翻译《鲁迅选集》个增田涉打听，侪呒没结果。

　　一直到1935年6月，《鲁迅选集》日译本在日本出版，《藤野先生》迭篇文章第一趟搭日本读者见面。藤野个儿子从福井中学教汉语个菅先生手里，看到了日译本《鲁迅选集》。听菅先生说，《藤野先生》一文个内容，可能是伊阿爸个事体，回到屋里告诉老爸。倷么，藤野才晓得迭位中国大名鼎鼎个文学家鲁迅，就是自己当年用红笔帮伊修改过讲义、笔记个中国留学生周树人。

　　鲁迅先生一直到去世，也勿晓得藤野先生个下落。鲁迅1937年去世后，藤野非常难过，伊个侄子藤野恒三郎说，有记者拿来一张鲁迅逝世时个照片拨严九郎看，爷叔才晓得鲁迅逝世了。伊个辰光，藤野先生正襟而坐，倷迭张照片举过头顶，提笔写了“谨忆周树人君”六个字。藤野还写了一篇怀念鲁迅个文章，发表在《文学向导》杂志上。文章里讲：“他大概曾到我家来辞过别，最后会面是啥辰光已经忘记了，伊一直拿我个照片挂了房间里，真是让人欣慰。”“如果周君因此而在小说里和友人之间把我当作恩师谈着，我要是老早读到该有多好啊!既然他至死还想知道我个消息，倘使通了音信，他本人也该多开心啊!”

　　藤野先生个晚景凄凉。45岁丧妻，生活交关困苦。1945年8月11日突发脑溢血在福井逝世，活了72岁。1976年10月19日，为纪念鲁迅逝世40周年，“中华人民共和国鲁迅展览会”首先在仙台开幕，鲁迅个儿子周海婴作为代表团顾问到日本，藤野个侄子恒三郎搭伊见面。前一代人呒没实现个遗愿，40年后终于由两人后代实现了。

　　藤野先生去世前，关照屋里人请许广平为伊题写“惜别”两字作墓碑。2007年9月25日上午，藤野先生个后人将伊个铜像运到中国，放在北京鲁迅博物馆里，作为纪念。