今年夏天，赤日炎炎，热得勿得了。搿天，朱鉴悅兄提议到花园饭店33层咖吧小聚，饮茶喝咖啡聊天，纳凉避暑。倷末一众好友落座饭店顶楼，品茗呷咖，尝啖冰镇瓜果，一歇谈谈国家盛事，一歇扯扯坊间趣闻，要么俯瞰窗外面个市容美景，真是来得个适意。

　　忽然之间想起六十多年前我小辰光热天哪能过个。伊个辰光大家经济条件侪比较差，特别是住了石库门房子个弄堂里，勿是人人侪可以天天吃得起棒冰、雪糕、冰砖冷饮等等个，更勿要讲每天开一只冰冻西瓜了。埃歇日脚最方便合算个消暑解渴个物事就是冷开水，每家人家屋里总是凉了一大罐（北方人叫凉白开），嘴巴干了，咕咚咕咚喝一大口。

　　搿辰光棒冰四分一根，断棒冰也要三分洋钿，也是一笔开销，一顿简单早点也不过四五分洋钿（一副大饼油条）。我记得顶顶便宜个解渴取凉办法是买一小块冰，加点醋加点糖含在嘴巴里，只要一分洋钿。迭个是小贩勒辣菜场旁边个机冰站（供应拨菜场冰冻鱼肉个）批一大块机冰，放进竹篮头里，用湿毛巾盖牢，快步走街穿弄堂叫卖，“冰哦，冰哦，卖冰哦，一分洋钿买一块——”有小囝拿碗来买，就用小榔头，螺丝刀凿一小块放了碗里，小囝开开心心拿回去。稍微考究点个，也可以用来冰绿豆汤或者糖水。搿是老上海一小景，现在想起来交关勿清爽。

　　我看见面前玻璃台子浪有冰咖啡、茶叶茶、西瓜、桔子、苹果、哈密瓜，窗外高楼幢幢，想想国家变化真大，恍然隔世。