阿拉小辰光，一到热天，马路上就会有流动摊头卖蝈蝈，摊主本事老大额，可以绑着许许多多个竹编的蝈蝈笼出来卖，我小辰光老佩服迭中摊主，我搞勿懂伊拉是哪能拿嘎许多蝈蝈笼子绑了一道个，客人挑中了一只，伊又可以快手快脚帮人家拿出来，其他笼子还是绑了一道？现在想想小辰光个想法是蛮戆个，但是伊个辰光就会一直想一些现在觉得老戆个问题。每只小笼子里只好养一只蝈蝈，买回家后，每天喂它一粒毛豆，蝈蝈就能为侬唱一个热天，想想还是蛮格算额。

　　阿拉小辰光，世界好像蛮清净个，勿像现在跑到啥地方侪是屏幕，商店里有，车厢里有，地铁里有……只要张开眼睛，就逃还逃勿开，我觉得简直已经是种光污染了。阿拉小辰光，电视机还勿是每家人家侪有个，啥人家有电视机，邻居侪会去看。每天吃好夜饭，我就马上搬只小凳子到隔壁人家个大天井里看电视，去得早好坐第一排。具体看过点啥节目已经勿记得了，但是伊个辰光急吼吼的心思我记得老清爽了。

　　看一歇电视，大人就会来叫我回去乘风凉。热了一天了，夜里坐了梧桐树下，点盘蚊香，用扇子扇扇风，听听广播里额乘凉晚会，蛮惬意额。有辰光，一阵晚风吹过来，真额瞎适意，比吃冷饮还适意。伊个辰光，听广播是主要个娱乐方式，节目也特别多，滑稽戏、上海说唱、流行歌、越剧沪剧侪有，播得最多个就是绕口令《金陵塔》和歌曲《军港之夜》。每趟放《金陵塔》我也会模仿着一道唱，但是气总归勿够长，到最后只好放弃了。交关越剧沪剧个唱段就是伊个辰光一遍遍听会个，《桑园访妻》《盘妻索妻·洞房》《志超读信》等等，就算已经过去了几十年，搿眼唱段侪记得特别牢，勿会忘记额。今年年头上，到上海沪剧院拜访茅善玉院长时，伊讲老想把古诗词用沪剧唱出来，走进中小学额，我觉得迭个想法老灵个，因为如果小朋友通过迭种方式学会古诗词，相信一辈子也勿会忘记，真额是又有趣又好记。

　　阿拉小辰光好白相个事体从数量上来讲好像勿算老多，但是伊个辰光日脚简单又惬意，树上知了声声地叫着，夏天个日脚是我记忆中最美的风景。伊个辰光，我总归觉得日脚会一直搿能平平淡淡过下去，外婆也会一直陪着我，从来也没想过有一天我会长大，外婆会离开我，这样的日子会永远地成为回忆的一部分……