“蛤蜊油”是啥物事呢？简单点讲，伊就是老底子个护肤品，用天然蛤蜊壳盛装，可以滋润皮肤，防止皮肤干裂。现在交关小年轻大多呒没看到过或者听到过，但是阿拉搿种年纪比较大个人还是经常会想到搿样物事，因为伊曾经伴随阿拉度过欢乐个童年辰光，承载过苦涩温暖个情意。

　　装蛤蜊油个蛤蜊壳有着琥珀色外壳，圆滚滚滑溜溜，表面缀有褐色额纹路。握辣手里向，手感既丰腴饱满，又沉甸甸有点坠手。一枚蛤蜊油简直就是一件精巧个工艺品。外壳有上下两个盖面，咬合处有“八”字形细碎牙齿，一旦咬合便严丝合缝，显得相当精细。蛤蜊油按照大小定价，小一眼嗰五分钱一个，稍许大一眼嗰一角钱一个，再大嗰也就一角五分洋钿。

　　蛤蜊油虽然身价不高，现在讲法就是勿上档次，但是效果相当明显，大冷天只要坚持搽一段辰光，干燥开裂个皮肤就会弥合，变得滋润光滑。蛤蜊油还有一种特殊个香味，阿拉侪老欢喜嗰，搽在肌肤上，香味可以保持交关辰光。

　　小辰光每当天气变冷，西北风开始刮起来，感觉面孔和手脚就要被风吹得干裂个辰光，姆妈就会买回一枚赤刮辣新个蛤蜊油，放辣屋里向个饭桌上。搿个辰光，阿拉兄弟姐妹侪会迫不及待地抢着打开蛤蜊油盒盖，用右手小指甲小心地刮起一眼眼，放辣左手手心里，然后双手贴合，摩擦发热，发热了会将稠腻个油脂融化，搽辣面孔上就均匀了。

　　有好多年，每天早浪为弟弟们面孔浪向搽蛤蜊油是我迭个阿哥个义务，勿过，要想拿捏好力度并不容易，有辰光力道用大了，或者被指甲划痛了，阿弟们难免大呼小叫一番，甚至还会到姆妈面前告状，我则难免会觉得委屈。每当搿个辰光，姆妈多半一笑了之，要么勿偏勿倚，各打五十大板。

　　一枚蛤蜊油用光了，空蛤蜊壳阿拉往往舍勿得厾脱，收藏辣抽屉里，想起来就拿辣手里把玩一番，直到残留个香味散光，或者又有了新蛤蜊壳，才会老勿情愿地掼进垃圾桶。不晓得从啥辰光开始，市面浪向各种各样个面油、护肤品越来越多，包装越来越精美，价钿也是越来越贵，经济实惠个蛤蜊油却再难觅到踪影。

　　前段辰光，一位老朋友到北方大连出差，特地带给我一枚蛤蜊油。我收到搿件礼物个辰光，心里邪气开心，迫不及待掰开壳子，一股浓香味道散发开来，但是与记忆里有点油腻有点浑浊个香味不大一样。再看看说明，原来搿枚蛤蜊油个配方与以前有所不同，里向又添加了不少新成分。

　　最近看到网浪向介绍，老年人用蛤蜊油搽面孔和手背，可以消除皮肤上个老年斑。我觉得或许有眼道理，就想买几盒送给九十岁个姆妈，也让伊开心开心。于是兴致勃勃到处去寻，跑商场、跑超市、跑小商品批发市场……却是遍寻不着。忽然间想起，现在流行网购，何不到网浪向去寻寻看，估计应该能寻到，就是勿晓得还能不能寻到记忆里个香味口伐？