慈姑是南方特产，长辣水田里，叶子像箭头，开白花。球茎黄白色或青白色,可以当蔬菜吃。

　　慈姑，慈祥个慈，姑娘个姑；或者写作慈菇，香菇个菇；或者写作茨菰，草字头下头次要个次，孤独个孤。

　　虽然有好几种名字，但以上几种名字里，“慈姑”是顶顶有人文精神个一种。《本草纲目》里是迭能讲嗰：“慈姑，一根发生十二子，如慈姑乳诸子，故以名。”

　　所以，慈姑迭个名字，里向包含嗰是古人对大自然里向万物生长代代相传个一种敬仰之心。

　　一到入冬前后，慈姑就成熟上市了。搿歇辰光侬假使齐巧到苏州去，就可以看到路边有阿婆坐辣马路边浪削慈姑片。

　　一块板浪镶块刀片，搁辣一只水盆浪向，看起来就好像一把反过来放个木工刨；阿婆手里个慈姑一趟趟从板浪擦过，慈姑片就像雪花一样一片一片落到下头个盆里，浸辣水里。稍稍沥干，摆进油锅里氽，慈姑片会鼓起来，又松又脆。样子跟土豆片差勿多，不过，味道是斜气勿一样嗰。至于哪能勿一样，侬吃过就晓得了。

　　烧慈姑要轧好道，比方讲，慈姑焅肉就比较经典。

　　五花肉汏清爽切块沥干，辣镬子里摆一点点油，拿肉煸到表面金黄；慈姑汏清爽，去皮去头尾，不过，我就欢喜拿慈姑个一根小尾巴挺了海；加水、稍许盐、黄酒、葱、姜跟五花肉一道焅到肉酥，加糖收汁就好盛起来了。

　　因为跟荤油轧了道，慈姑个吃口就变得肥笃笃了，本来自带个一点点苦味道也勿知勿觉就变成回甘了。

　　有趣，苦与甜好像是可以相互渗透与转换嗰。

　　【沪语解释】

　　焅：煨。

　　齐巧：刚好。