现在超市鸡蛋交交关关，一袋标价九块九角三分个碎壳蛋有靠廿只。正常鸡蛋10只也只要迭个价钿。旁边一个男顾客讲：“搿碎壳蛋买回去做蛋饺蛮好！勿过搁歇人家侪买现成个吃了。”我笑着问伊：“侬也会做啊？”“我当然会做。现在小青年倒做不来了。”

　　是嗰，阿拉小辰光十几岁时就学做家务，生煤球炉烧饭，早上还排队买菜。过年辰光为了丰富饭菜品种，交关屋里侪会教小人哪能做蛋饺。可惜阿拉屋里侪是北方人，做面食包饺子相当拿手，但是蛋饺倒是勿会做。我是读初中辰光从同学丽娟搿搭学会做蛋饺个手艺嗰。

　　要做蛋饺当然需要用到鸡蛋，但是埃个辰光鸡蛋需要凭票供应，搿种凭票买来个完整鸡蛋一般侪是整只煮熟，做白煮蛋和酱煨蛋，或者自家腌咸蛋。至于蛋糊、蛋饺等需要拿蛋打散以后做个菜，一般用“冰蛋”来做。所谓“冰蛋”其实就是用碎壳蛋里个蛋液搅拌加水后冻成冰，再切割成统一大小个块状，运到菜场里按块出售。搿种“冰蛋”不要蛋票，价钿也比鲜蛋便宜。

　　“冰蛋”买回来需要解冻，一般就是放辣搪瓷碗里晒太阳。丽娟等冰化得差勿多了，会再打两只鲜蛋放到冰蛋里拌匀，据说迭能蛋液就会比较凝，做出来个蛋饺也是金灿灿嗰，好吃又好看。

　　做蛋饺，要准备肉糜做馅子，放好调料咸淡适宜，剁点小葱很鲜香；再备一个舀汤盛粥个金属勺，一般人家用铝勺居多，同学丽娟家比较考究，用嗰是铜勺，据说铜勺个好处是传热更加快，当然勺柄也就更加容易烫手，丽娟就用两块小毛巾拿勺柄包起来。还有就是准备好煤球炉——炉门封一半留小火。中饭吃好，碗汏好，剩下来个辰光就可以利用炉子上个小火做蛋饺啦。

　　我学丽娟个手法拿铝勺辣肥肉浪向抹一抹，等勺子温度高了用调羹舀蛋液进勺，转动勺子，让蛋液变成圆形蛋皮，再搛一团肉糜放到蛋皮浪，最后用筷子将蛋皮合成半圆并点结实不让伊裂开。第一只蛋饺就搿能做好了，接下去就是一只只连辣海做，越做做熟练。丽娟是熟手，手势快，铜勺热得也快，一歇歇就做好了十几只，只只侪是“正品”，呒没“次品”。我是生手，一开始做个蛋饺不合格，原因多种多样，比如：油抹多了；勺子太烫了；倒蛋液放馅个辰光呒没掌握好，使得蛋饺变成了“蛋炒肉”……好在“蛋炒肉”个味道也是喷香，阿弟欢喜吃，我尝了尝，还觉得味道邪气好。

　　自从学会做蛋饺，每年屋里过春节，我做个蛋饺侪是年夜饭个“必备品”，无论是红烧、炒菜还是烧三鲜汤,侪邪气受欢迎。

　　现在年纪侪大了，曾经个小伙伴天各一方，丽娟也去了外国，勿晓得伊是不是还亲手做蛋饺。对我来讲，现在超市里有现做现卖，就乐得省力买现成嗰啦。