图文 / 沈一珠

　　初夏辰光，蛙声初起蝉未鸣，正是吃时鲜小菜个好辰光，例如香莴笋，细细切一切，葱油拌一拌，刮辣生脆，鲜香爽口，味道邪气香。

　　虽然长得有点像竹笋，也是一节一节朝上头窜，但香莴笋终归勿是笋，因为伊再长，也长勿成晾衣裳竹竿。

　　上海人，或者是南方有一眼地方个人，欢喜叫伊香莴笋，是因为无论香莴笋叶子还是香莴笋根茎，侪有一种特别个香气，所以交关人欢喜用香莴笋叶子烧菜饭。从前上海大多数人侪住得像七十二家房客个辰光，只要一只灶头浪烧香莴笋叶子菜饭，基本浪家家人家侪闻得着香气了，就算吃勿着，闻闻也开胃口。

　　搿两天，是香莴笋好吃个辰光。阿拉住辣城乡结合部，好处也有一眼嗰，常常会碰着本地人拿自家种个蔬菜摆出来卖。前两天就碰着一个爷叔，一部“老坦克”（旧脚踏车）戤（倚靠）辣围墙浪，车子浪运个香莴笋看上去矮墩墩，壮笃笃，卖相蛮好。勿像菜场里有种香莴笋，长得像半根晾衣裳竹头。搿个爷叔看见人就招呼：自家种拉嗰，勿拨侬当上嗰，好吃得勿得了。结果，我也买了几根。

　　香莴笋去脱外头硬结结个皮，切片，再切丝，用盐轻轻交掿一掿（揉捏一下），腌五六分钟，冷开水里汏清爽，摆点糖、麻油，拌一拌，就可以吃了，又便当，又好吃。

　　只勿过，从前听老年纪人讲起过，香莴笋火气大，多吃眼睛要糊。据说古医书也有记载，讲多吃，眼睛要糊，勿吃就会恢复。葛末，适可而止就好了。其实也是嗰，再好吃个物事，侪勿可以穷吃八吃。