文 / 侯宝良

　　前段辰光有朋友买了一辆新能源汽车，辣朋友圈里感叹“再也勿需要去加油了”。我看了以后，忽然想起两种已经消失个加油生意：一种是打火机里加汽油；一种是圆珠笔芯里加油墨。小辰光搿两种加油生意是曾经兴旺过一段辰光嗰。

　　记得埃歇辰光欢喜“掼派头”个老克勒用火，像点香烟、点煤球炉咾啥侪用汽油打火机。汽油打火机是由齿轮摩擦电石产生火星点燃饱含汽油个棉芯线，原理有点像后来中学里做化学实验个酒精灯。搿种老式打火机个常用耗材就是电石和汽油，其中电石蛮经用，一粒可以用交关辰光，但是汽油容易挥发，所以经常需要加油。乃末当时市面浪交关烟纸店里侪增加了一种新业务。有需要个顾客只要看到柜台角落里有一只插有胶头滴管个密封玻璃瓶，就晓得搿爿店里可以为打火机加油。一般加一次油只要几分洋钿，自家动手或者请营业员帮忙侪可以。

　　为打火机加油呒没啥技术难度，相比之下，为圆珠笔芯加油墨就复杂多了，勿但需要用到专门器具，还有一套工艺，技术难度堪比现在为手机换屏幕。假使师傅技术勿过关，重新灌装个笔芯勿是写字勿流畅，就是会漏油，搿支笔芯也就废脱了。以前阿拉屋里勿远个街面邻居就摆过圆珠笔芯加油摊，配套工具是几只装有红、蓝、黑等颜色油墨个大号医用注射器，装针头个地方有专用接头，另外就是几根细钢丝。

　　我看过伊个操作流程：先拿笔芯个铜笔头拔出来，再用细钢丝顶出笔头顶端个圆珠，然后拿笔头装回笔芯。空笔芯顶牢注射器浪个专用接口，像打针一样推活塞，油墨就一点点朝空笔头里灌进去了。灌进一定量油墨后重新压进笔头浪个圆珠就好了。迭个人蛮有本事嗰，碰到圆珠笔有漏油毛病，伊有办法封闭笔头间隙；有些圆珠毛糙、勿活络，伊会通过碾磨来润滑圆珠恢复使用。

　　老早子人侪讲究节约，勿少人带一大把空笔芯寻过来，小摊头生意邪气好！伊拉一家门吃用开销就靠伊摆个摊头。一直到上世纪60年代末，搿家邻居离开了，圆珠笔芯加油摊也就消失了。后来，市场浪出现了使用丁烷气体个新式打火机，勿但一点就着，而且呒没汽油味，乃末打火机加汽油也慢慢交消失了。再后来又有了一次性打火机、一次性圆珠笔等一次性产品。到了现在，讲到加油，大家只会想到汽车。屋里向个小辈听我讲老早搿两种加油个故事，就像辣听天方夜谭。