文 / 龚德位

　　一日坐出租，同司机师傅闲谈。我讲：“搿几年交通秩序好交关了！”“现在好交关了，以前勿是搿能样子嗰。”师傅接口。聊得投机，师傅讲起以前跑出租车必须“看得惯”。

　　埃歇辰光，交关人为了多跑几单生意，占线、抢道侪是家常便饭。有人因为“看勿惯”，就“别人抢，我也抢”，结果往往抢出交通事故。伊就一直提醒自家要“看得惯”，“别人抢，我不抢”，有安全才有好生活。

　　我觉得搿位司机师傅讲得邪气有道理。而且，生活当中同样需要搿种“看得惯”。我有一个闺蜜，平常买了交关衣裳，拿衣柜塞得塌塌铺，但是仍旧为穿啥衣裳出门而烦恼，因为试穿辰光经常“看勿惯”。后来，伊痛定思痛，拿大多数衣裳打包，只留三四套挂辣衣柜里，出门之前随便拎一件穿，勿但节约大量辰光，而且不发愁，不磨叽，感觉一身轻松。

　　按照苏格拉底个讲法：当阿拉为奢侈生活而疲于奔波，幸福生活已经离阿拉越来越远了。阿拉想得越多，能守住嗰反而越少。人生需要“看得惯”，勿攀比，勿盲从，平平常常，自自然然，疲累就会少一眼，生活里个幸福就会多一眼。