文 / 赵韩德

　　小辰光屋里呒没管道煤气，大家侪用煤球炉，后来升级为煤饼炉。镇上老虎灶起先烧柴爿，后来烧煤块。辣各种炉子当中，我印象最深个是七星炉。

　　镇西边五狗老板个茶馆店被关脱以后，老虎灶还开辣海。茶桌，只剩一张，放辣老虎灶角落头里。冷天日脚，搿搭是我顶要去个地方。老虎灶灶膛里烈火熊熊，我觉得伊就像火车头（埃歇辰光我年纪小，呒没乘过火车，只辣电影里看到过），假使给它装上轮子，或许就能开起来了。老虎灶出煤渣个地方是一个凹坑，暗红色个煤渣要用铲子铲出来。五狗老板立辣坑里挥铁锹，满脸是汗，像英雄，像辣打地道战。

　　读小学辰光，下半天勿上课，大冷天，阿拉小朋友就到老虎灶个茶桌浪做作业。五狗老板个儿子叫阿茂，是阿拉同学，一个学习小组里嗰。有一天，老虎灶旁边出现了一样新奇东西，比柏油桶还要高，还要大，上面竟然一口气炖了7只水壶。每只水壶底下，火焰呼呼蹿，生猛威风。阿茂骄傲个介绍：“搿叫七星炉！”

　　“老虎灶新添了七星炉”，勿到半天消息就传遍全镇。大家第一反应侪是“好极了”。因为辣七星炉浪煮开一锅泡饭，烧开一锅汤，或者烧开一壶水，只需要2分洋钿，比自家屋里生煤炉方便得多。五狗老板个七星炉配有一只电动鼓风机，开起来就“呜呜”响，相比阿拉屋里扇煤炉个破蒲扇，力道不晓得超过多少。七星炉前常常排起长队。反正炉火旺，烧得快，排队也勿需要太多辰光。埃歇辰光邻居之间还是蛮客气嗰，排队个人往往还会互相谦让一番。

　　阿拉几个小朋友因为经常辣七星炉旁边活动，经过仔细观察，发现搿只炉子还可以进一步利用。因为火头旺，锅子或水壶底下个火焰常常蹿出来，阿拉就偷偷从屋里拿一只山芋，或者一根年糕，放辣炉口之间。勿需要多少辰光，烘山芋个香气，或者烤年糕个焦香味道，就会散布开来，特别诱人。

　　阿拉侪是阿茂个同学，五狗老板眼开眼闭不收铜钿嗰。不过假使其他人也想来出外快烘山芋，阿茂就会虎起面孔，立起来讲：“勿来三！勿来三！”“七星”之间个地盘，显然是阿拉学习小组专用嗰。这使得阿拉读书做作业，侪充满快乐。一直到天黑，姆妈来敲老虎灶个大窗，喊：“好转来了，吃夜饭了。”阿拉才恋恋不舍个离开老虎灶，离开七星炉。

　　后来听阿庆嫂唱京戏：“垒起七星灶，铜壶煮三江；摆开八仙桌，招待十六方。”有人勿晓得啥是七星灶，阿拉一听就煞辣势清。